Mizoram-ah Thirsakawr hmanga intlansiakna Tour de Hmuifang 2024 hlawhtling taka neih a ni

Mizoram infiamna huang chhunga inelna hautak te zinga mi, kawngthui leh hahthlak tak zawha thirsakawr hmanga intlansiakna, Tour de Hmuifang 2024 chu nimin khan neih leh niin he intlansiak ah hian mi 48 zet an tel a ni.

Mizoram sawrkar-a Tourism Department, Mizoram Cycling Association (MiCA) leh NEC tangtlang in an buatsaih ‘Tour de Hmuifang 2024’ a tel te hi nimin zing khan Tourism Minister Lalrinpuii chuan Aizawl-a Vanapa Hall kawt atangin a vailiam a, thu sawiin infiamna hrang hrang zingah Thirsakawr vangin Mizoram in ram dang hmelhriat kan hlawh chhoh mek thu leh Tour de Hmuifang intihsiakna State pawn mi ten hmelhriata an rawn tel chu lawmawm a tih thu a sawi a. Mizoram Tourism hmasawnna kawng pawimawh taka nih thu leh hei aia changtlung zawka buatsaih zel tum a nih thu a sawi a, infiammi ten theihtawp chhuaha Mizoram ti hmingmawi tura tan la zel turin a fuih bawk a ni.

He hun hi MiCA President Dr. Franklin Lalrinngheta chuan kaihruaiin Riders te fuihna leh duhsakna thu a sawi bakah Mizoram Polution Control Board (MPCB) atangin Programme Officer Benjamin Lalnunsanga chuan boruak thianghlim vawnhim pawimawh zia leh chumi tura Thirsakawr khalh intihhmuh zel turin pungkhawm te chu a chah bawk a ni.

Thirsakawr hmanga Aizawl atanga Hmuifang Tlang thlenga intlansiak-ah hian tel tura hming pelut mi 48 awmin an zingah hian mipa 46 leh Hmeichhia 2 an tel a, State pawn atanga rawn tel mi 13 awmin Manipur atangin 3, Meghalaya atangin 9 leh Bangalore atangin mi pakhat te an ni a. Categoty chi hrang panga (5) Junior, Elite, Master leh Road (Open) Category bakah Hmeichhe Category-ah intihsiakna hi neih a ni.

Tour de Hmuifang 2024 hi Aizawl atanga tanin Junior leh Master Category te hi Maubuang khawchhungah lutin Thiak khawchhung Tlang chhip lamah chhoin kawngpui an rawn pawh leh a, Midum kham-ah chhoin Hmuifang thlengin KM 54 an tlan a. Junior (kum 18 hnuailam)-ah hian Thotmachan Awungshi (Manipur) chu pakhatna niin Master (kum 35 chunglam) Category-ah hian Peter Zohmingliana (Bungkawn) chu pakhatna a ni bawk.

Road (Open) Category-ah hian Hmuifang kawngdung pangngaiah tlanin KM 50-a thui an tlan a, Laldintluanga (Chanmari) chu pakhatna a ni a. Intihsiakna hautak ber leh pui ber Elite Category hi Muallungthu atangin Tuirial lamah tlanin Khumtung-ah an chhuak a, Baktawng atanga Hmawngkawn, Chawilung, Lamchhip lamah kalin Hmuifang-ah an rawn chhuak leh a, an tlankawng thui zawng hi KM 82 niin K. Ronel Singh (Manipur) chu pakhatna a ni bawk. Hmeichhe tana Category buatsaih ah hian tel pahnih chauh awmin intihsiakna anga kalpui a ni lo thung a ni.