YMA-sawrkar tan pawh innghahna a nih thu sawi

PHE Department changtu Minister Prof. Lalnilawma chuan YMA chu sawrkar tan pawh an innghahna leh thlamuantu a nih thu a sawi.

Seling Branch YMA kum 50-na, Golden Jubille lawmna hun nimin-a Seling YMA Run-a neih a hmanpuina ah Tawi Bialtu MLA leh PHE Minister Prof. Lalnilawma chuan YMA chu Zofate tana hnam rohlu a nih thu leh Sawrkar leh YMA ten ram siamthatna kawnga thawhdunna tha tak an neih chu lawmawm a tih thu a sawi a. “YMA hi kan khawtlang rohlu leh Zofate rohlu a ni a, YMA hi awmlo ta se, tute nge thlan lai ta ang, tute nge khawhar Inah kal anga, tute nge tlawmngaia ruihlo do ta ang le? YMA hi awm lo ta se, kan ram dinhmun tur pawh hi ngaihtuah ngam a ni lo. Chuvangin Zofate tan Pathian in YMA min pe hi malsawmna hlu tak a ni,” a ti a. “YMA hian thiltum tha tak tak a nei a, Hunawl hman that, Zofate hmasawnna ngaihtuah, Kristian nundan tha ngaihsan tihte niin heng YMA thiltum te hmang hian kan khawtlang leh ram tan nasa takin hna an thawka, Kumpuan te neiin Zirna kawnga thalai ten hma an sawn theih nan hma an la a, Kohhrante nen lunrual takin mihring nun siamthat kawngah tha an thawh mek a, Chutiang zelin ram leh hnam humhalhna kawngah YMA hian a thawh hlawk em em a ni,” tiin “Sawrkar tan pawh YMA hi kan innghahna leh min thlamuantu a ni a, tuihna humhalh kawngah t, PHE Department puitu niin nasa takin ke an pen a, ruihhlo do kawng ah leh hnam ziarang chawinun bakah kawng hrang hranga Sawrkar leh YMA ten thawhdunna tha tak kan nei hi thil lawmawm tak a ni,” a ti.

Seling Branch YMA hi kum 1974-a din niin tunah hian YMA Member 1047 an awm mek a, Golden Jubilee lawmna ah hian Member boral te sunna hun hmangin Souvenir tlangzarh a ni bawk.