Zawng chhuak tina lo turin ngen

Tunhnai a ramngaw atanga mihring chenna hmuna Zawng chhuak chu Environment, Forest & Climate Change Department chuan report an dawn hnuhnung berah Samlukhai khua velah a awm tih an sawi.

Nimin-a Akashvani Palai in a kawmnaah Deputy Conservator of Forest (Wildlife) Margaret Lalramchhani chuan Zawng chhuak chu a tirah chuan Dampa Tiger Reserve, West Phaileng bul vel atangin a chhuak, a hnuah Dapchhuah-ah hmuh lehin sairang bawr velah hmuh leh a nih thu a sawi a. Tunhnaia Chhim phei-a Zawng an hmuh chhunzawm nen Zawng thuhmun a ni em tih hriat ni chiah lo mah se, report an dawn hnuhnung berah chuan tunhnaia Chhimphei-a Zawng an hmuh chu Samlukhai bawr ah a awm thu a sawi a ni.

DCF chuan Zawng chhuak chu mipui a tihbuai lem loh chuan Sahuana dahluh a nih dawn loh thu sawiin, Sahuan-ah a hranga dah bikna tur a awm lo a, Zawng awmsa a tam a, awm thar a awm hian an lo tihhlum deuh tlangpui avangin dah ngam a ni lo tih a sawi a. Ramhnuaia a luh leh theih an duh ber avangin va tihbuai loh an duh ber tih sawiin DCF chuan, mipuite chu eitur lo pe lo turin an ngen tih an sawi a, dawhthei taka lo tina lo chhunzawm zel turin an chah tih a sawi bawk.

Margaret Lalramchhani chuan ramsa reng reng man-a bawm-a khungin Capture Myopathy an tih, khungbeh an nih avanga rilru na leh buai avanga chaw ei thei lo, thi ta mai a tam hle tih sawiin, hei vang hian Department chuan man kher an tum rih lo tih a sawi a. Hetih rual hian mihringte a tibuai a, a ti na a nih chuan hma lak nghal an tum thung tih an sawi a. Mihringte a tihnat an nghak tihna ni loin, mipui tana a hlauhawm theihna thil thleng a awm a nih chuan Department hriattir nghal turin a chah a. Tun thlengin mipui atanga harsatna tawk in report an la awm loh thu sawiin, report a awm thulha che nghal thei turin ruahmanna erawh an siam tih a sawi a ni.