Kumin chhungin Mizoram-ah zu leh ruihtheih thil cheng vbc. 182.10 hu zet tihchhiat a ni tawh

Mizoram-a sawrkar leh NGO-ten Zu leh ruihhlo do beihpui an thlak kal mekah kumin chhungin ruihtheih thil chi hrang hrang Vbc. 182.10 hu zu zet tihchhiat a ni tawh a. A hlawm lian-a zu leh ruihtheih thil tihchhiat hi tum 5 awm tawhin Meth/Crystal Meth chu ruihhlo tihchhiat zingah hian a tam fal hle a ni.

Excise & Narcotics Department leh Police te bakah tlawmngai pawl ten zu leh ruihtheih thil an man te hi Court-a chinfel a nih hnuah Court remtihna in tihchhiat thin a ni a, kumin chhung hian Excise & Narcotics Department leh Mizoram Police bakah Central YMA Kumpuan Committee te chuan Zu leh ruihtheih thil an man te hi tichhe tawhin hetianga a hlawm liana tihchhiat hi tum 5 neih a ni tawh a, heng-a an tihchhiat zawng zawng hi Rs. 1,82,10,98,111.55 (Vbc. 182.10) man zet tlingin Methamphetamine leh Crystal Meth a tam ber a, Methamphetamine hi kg. 150.242 tichhiain Rs. 19,53,14,600 hu a tling a, Crystal Meth pawh kg 36.251 zet tichhiain hei hi Rs. 1,08,75,30,000 hu a tling bawk a. Heng bakah hian Excise & Narcotics Department in Zu an man an tihchhiat chu Rs. 57,15,800 hu zet a tling tawh bawk a ni.

Thudawn danin, NGO (Central YMA) bakah, District hrang hranga Police leh Excise & Narcotics Department ten theihtawp chhuahin ruihhlo dona kawngah hma an la chhunzawm mek reng a, thalaite leh mipui hnenah te ruihhlo laka fihlim tura inzirtirna (awareness campaign) nasa takin an kalpui a. Awareness campaign hi Mizoram chhunga zirna In hrang hrangah neih thin niin, Signature Campaign pawh hmun engemaw zatah neih a ni tawh bawk.

Hetihlai hian kumin January atanga October thla chhungin Mizoram-ah ruihhlo hmansual vanga thi mipa 53 leh hmeichhia pariat, an vaiin mi 61 an awm tawh nia chhinchiah a ni a, kum 1984 atanga kumin thlengin ruihhlo vanga thi mi 1,871 awm tawhin, chung mite chu mipa 1,644 leh hmeichhia 227 an ni.