International Level thlenga ngaihtuahna sen tul ti

Sports Minister Lalnghinglova Hmar chuan Mizoram Sports in hma a sawn zel theihna’n Sports Association hruaitute leh infiammite’n National Level leh International Level thleng phaka ngaihtuahna kan sen a tul, a ti.

Beijing (China)-a Taekwondo leh Bachelor of Arts (BA) zir tura thlan mi pahnih te fuihna leh thlahna hun nimin-a a Pisa-a neih ah Sports Minister chuan he thu hi sawiin, Mizoram Amateur Taekwondo Association (MATA) hruaitute hmathlir leh hmalakna hrang hrangte lawmawm a tih thu leh Taekwondo chu International Level-a Medal hnaih theihna Sports discipline zingah a tel thu a sawi a. He huna an thlah tak Vanlalhmangaihzuali leh Joseph Vanlalpeka te chu an University leh China-ah Mizo aiawhtu leh Mizoram hmel lanna an nih dawn avangin an zirna leh nitin nunphungah Mizo nun zemawi vawng zel turin a chah a. Tawng, hriselna leh zirna chungchangah harsatna an tawh chang pawhin an kal chhan hre reng a, hlawhtling ngei tura thawkrim turin a fuih bawk.

Taekwondo leh Bachelor of Arts (BA) zir tura thlan mi pahnih Vanlalhmangaihzuali d/o Lalrinawma, Kolasib New Diakkawn leh Joseph Vanlalpeka s/o Lalremruata (L), Armed Veng South te zirna tur hi Capital University of Physical Education & Sports, Beijing, China-ah niin Foreign sponsorship quota a lut tur an ni a. Kumin June ni 13-14 chhunga Aizawl-a Mizoram Sports Conclave buatsaih a nih tuma lo kal Grand Master Kim Hee do leh Grand Master Lee Jeong Hee te’n Mizoram Olympic 2036 Vision a hlawhtlinna turin he sponsorship hi an buaipui a ni.

He Sports University-ah sponsorship hmuh thu hriat vel leh hian MATA chuan thuchhuah siam nghalin, diltu engemaw zat atangin Grand Master ten tehfung chi hrang hrang hmangin an lo endik a. Endikna hrang hrang paltlang hnuah India atangin Vanlalhmangaihi leh Joseph Vanlalpeka te chu zir thei tura thlan an ni ta a. University-ah hian China zirlaite kalphung ang thovin kum khat chhung chu China tawng (Mandarin) zir pahin, Taekwondo zirtirna an kalpui ang a. Kum khat hnuah hian Bachelor of Arts an zir chhunzawm nghal dawn a ni.

India quota-a tling thei Mizo Taekwondo player pahnihte hi MATA player tha tak ve ve an ni a. Kolasib New Diakkawn nula Vanlal-hmangaihzuali hian Kolasib Taekwondo Club atangin Taekwondo a rawn zirchhuak a, Goa National Games leh National Senior Championship hnuhnung berah khan Gold Medal a la ve ve a ni. Armed Veng South tlangval Joseph Vanlalpekhlua hi National Junior Champion lai niin Mizoram tan vawi tam tak Medal lo la tawhtu a ni a. Exodus School Taekwondo Club-ah Taekwondo a zir mek a ni. Sports Minister hian Vanlalhmangaihzuali leh Joseph-a te hi pawisafai a pai a ni.