Serchhip District-in Tour Itinerary Creation Competition-a lawmman pakhatna a lak lawmna neih a ni

Mizoram sawrkar-a Tourism Department in District hrang hrangte tana Tour Itinerary Creation Competition a buatsaiha Serchhip District in lawmman pakhatna a dawn lawmna chu nimin khan neih niin Tourism chungchanga hmalak zui dan tur sawihona neih nghal a ni.

Serchhip DC Pisapui Hall-a he hun hman ah hian Bawrhsap Paul L. Khuma chuan Tour Itinerary Creation Competition-ah Serchhip District-in lawmman pakhatna a dawng chu DC Office chauh ni lo, Serchhip District mipuite tana hlawhtlinna ropui tak a ni tih a sawi a. He Competition-a lawmman pakhatna dawng thei tura tha thawhtute zawng zawng chungah lawmthu sawiin, Serchhip District chuan khualzinmite hip turin hmunhma a nei tha em em a, keini a mi chengten ngaiah kan lo neih thil tam tak hi State pawn atanga khualzin lo kalte tan chuan thil mawi leh hmuhnawm a tling a ni, a ti a. Khuanu min duansak hmun mawi tak tak kan neih te hi kan tihlar thiam a, khualzin lo kal apiang te kan dawnsawn that a, lo kal nawn an chakna tura kan duat thiam a pawimawh a ni, a ti. Bawrhsap chuan Tourism Industry hmasawn nasatzia sawiin, “Khawvela industry thang chak ber palina a ni,” a ti a. “Sum tam tak thawhchhuah theihna remchang a nih avangin keini Serchhip District mipuite pawhin Tourism Sector a chak taka hma kan sawn theihna turin hmathlir thui tak neiin, khualzinte buaipui dan inzir te, Social Media hman tangkai te kan inzir zel a tul a ni, a ti. 

Serchhip District in District-Wise Tour Itinerary Creation Competition-a lawmman pakhatna a lak lawmna hun hi Serchhip Addl. DC Lalrinzuala chuan kaihruaiin Tourism Department-a Deputy Director Dr. R Lalrinchhani chuan Serchhip District-in tourism hmasawnna atana hmunhma a neih thatzia te sawiin, Thenzawl chungchang-ah Sawrkar Laipui Ministry of DoNER hnuaiah Global Model Site atan Thenzawl chu thlan a nih thu a sawi a. He hmalakna hnuaiah hian ruahmanna hrang hrang siamin sum tam zawk haichhuak tura hma an lakna te a sawi a. Thenzawl-a Tourist Lodge pawh changtlung leh changkang zawka siam tura ruahmanna an neih te a sawi a. Mizoram Aero-Sports Association President J.Vanlalliana pawhin Serchhip-a International Paragliding Accuracy Championship neih tur chungchang te, Paragliding kaihhnawiha Serchhip in Tourism potential a neih thatzia te a sawizau bawk a ni.

District-Wise Tour Itinerary Creation Competition vawikhatna hi November ni 5, 2024 zan khan Ignite Studio, Khatla-ah Tourism Department in a buatsaih a. He Competition-ah hian Serchhip District aiawhin Additional DC Lalrinzuala leh Sub-Deputy Commissioner Dr C. Vanlalchhanhimi te telin lawmman pakhatna an la a, pawisafai Rs. 30,000/- dawngin nimin-a he hun hman ah hian Dr. C. Vanlalchhanhimi hian intihsiakna neih tuma an Presentation chu a sawifiah leh bawk a ni.