Aizawl City Centre-ah hna za zela 55 zo tawh

Aizawl Bazarpui (New Market)-a sumdawng 1,105-te lenna tur building sak mek, Aizawl City Centre sak hna chu tun thlengin zaa 55 (55%) sak zawh tawh a ni.

Cheng vbc. 42.83 senna tur Aizawl City Centre sakna atan atan hian November 16, 2022 atangin sumdawngte an inthiarchhuak tanin hnathawhna tur hmunte hung a ni a. Aizawl Smart City hotute chuan tun thlengin building sak hna hi zaa 55 thawh tawh a nih thu leh a theih anga chakin hmalakna kalpui mek zel a ni tih an sawi a ni. Aizawl City Centre sakna tur atan hian Urban Development & Poverty Alleviation (UD&PA) chuan September 22, 2022-ah LoA (Letter of Acceptance) a pechhuak a, a sakna sum hi Smart City Mission atangin hmuh a ni a. A sakna atan cheng vbc. 42.83 dah niin project hming chu Modernisation of Bara Bazaar - Trade Facility - cum-Exhibition Area’ tih a ni a, design siam turin intihsiakna buatsaih a ni a, Catalyst Architecture thlan a ni.

Building hi block hnih (2)-ah then a ni a, a hnuai ber Parking leh Cold Storage-a hman tur niin, Parking-ah hian Two Wheeler 79 leh Four Wheeler 31 te a leng thei dawn a, Block A chu chhawng sarih tur a ni a, dawr 458 a awm ang a. Block B-ah dawr 647 a awm bawk ang a, Block B hi chhawng ngaa sak tur a ni.

UD&PA Department hnuaia Aizawl Smart City Limited-ten a sak hna an enkawl, Aizawl City Centre sak hna hi January, 2023-ah tan niin, November 30, 2025 a zawh tura ruahman a ni.