Governor leh Central CIC te an inkawm

Mizoram-a rawn zin Chief Information Commissioner of India Heeralal Samariya IAS (Rtd.) leh Governor Dr. Hari Babu Kambhampati te chu nimin khan Raj Bhavan-ah an inkawm.

He inkawmna ah hian Dr. Hari Babu Kambhampati chuan Mizoram chu State nuam leh ralmuang, sik leh sa nuam leh Tourism Sector-a theihna nasa tak nei a nih thu sawiin, Sawrkar tha, rinngam leh langtlang siam kawnga pawimawh tak Right to Information (RTI) Act pawh mipuite'n an hmelhriat chhoh zel thu leh tangkai taka hman a nih thu a sawi a. RTI Act buaipuitute chu mipuite'n information dik leh rintlak an hriat zel theih nana theihtawp chhuaha hma la zel turin a chah bawk a ni. 

Chief Information Commissioner of India Heeralal Samariya IAS (Rtd.) chuan hmun dang ngaihtuahin Mizorama RTI hmanga dilna lutte hun bituk ni 30 chhunga tha taka chinfel nghal zung zung a ni thin leh za zela 1 aia tlemin thuneitu sang zawk, First Appellate Authority leh Second ApAellate authority an thleng chu lawmawm a tih thu a sawi a, hei hian RTI Act buaipuitu Official, NGO, VC/LC leh mipuite'n he dan hi an ngaihven tlang tih a tarlang niin a sawi a. RTI Act chu Sawrkar tha siam kawnga hmanraw pawimawh tak a nih thu sawiin, Sawrkar laipuiah kumtin RTI application 20000 vel Second appeal kaltlanga dawn a nih thu leh case tam zawk chu a hnuai lamah chinfel a nih thin thu a sawi bawk. 

He huna tarlan a nih dan chuan Mizoram-ah Financial Year hmasa 2023-2024 chhung khan RTI Act hmanga dilna lut 5741 awmin dilna lutte chinfel zel niin Second Appeal hmanga State Information Commission-a lungawilohna thlen chu 1% pawh a tlinglo a, insawifiah tura koh an nih hmain heng zinga 90% te hian RTI Act hmanga information diltu hnenah chhanna kimchang an pe vek hman a ni. 

Central Chief Information Commissioner Heeralal Samariya hian nimin vek khan Aizawl-ah thuthar thehdarhtute kawmin Mizo mipuite chu RTI Act hmang tangkai thei tura inzir turin a fuih a. RTI Act hmangin mipuite chuan sawrkarin eng nge a tih mek tih leh eng angin nge sawrkar in hna a thawh thin tih an hre thei vek tih sawiin, “Langtlang taka sawrkar in hna a thawh theih nan mipuiten RTI Act an hmang tangkai thei a, he dan hmang hian sawrkar hotute khalh ngiltu pawimawh tak, mipuite tana sawrkar tha siamtu an ni thei a ni,” a ti a. Mizoram State Information Commission in tha takin hna an thawk tih sawiin, an hnena case hrang hrang awmte tha takin an chinfel zel thu leh lawmawm a tih thu a sawi bawk.

Chief Information Commissioner of India hi Mizoram Information Commission-a Chief Information Commissioner John Neihlaia leh Information Commissioner Mangjangam Touthang te'n an tawiawm a ni.