Seling khuaa chenna In pakhat thiah thu ah cheng nuai 25 in inremna siam a ni
Seling leh Champhai inkar Kawngpui NH-06 laih hna kal meka Aizawl District chhung Seling khuaa sawrkar in hmeithai chenna In a thiah sak chungchangah hmalak nghal niin, nimin khan a tuartu chhungkua te nen cheng nuai 25 in inremna siam a ni.
Seling khawchhunga chenna In pakhat hi NH-06 laih mekah ram lak tur zingah telin niminpiah khan hnathawktute chuan an bungrua te thiarchhuakin khawl hmangin he In hi thiah a ni a, hemi duh loh lantirna atan hian nimin khan Seling-ah Joint NGO te chuan kawng zawhin he hunah hian Centre for Environment & Social Justice (CESJ) te pawh an tel a. CESJ hruaitu Vanramchhungi, Ruatfela Nu tia hriat lar chuan sawrkarin hmeithai Lalhmangaihi In thiah sak tura DC/CALA leh Revenue ten thuneihna lek an chakna chu mak an tih thu sawiin, tui in tur leh thing leh mau chhiar sen loh leh nungcha tichhetute lakah District hotuten vawikhat tal ke an pen em tih chu an zawhna a nih thu a sawi a, hmeithai, taksa lama harsatna nei lehnghal chunga hetianga an tih chhan hriat tuma kal an nih thu sawiin, a tuartu chhungkua te hi mitthi In-a an kal laiin thuneituten kawngka kalh vawchhiain bungrua te an thiarchhuak niin a sawi a. Tunhnaia Supreme Court pawhin Bulldozer hmanga mi In thiah sak a khap lai leh a tuartu te lehkha an pek atanga insawifiahna hun ni 15 pek tur tih pawh sawrkarin a zawm loh thu a sawi a ni.
He In thiah chungchangah hian nimin vek khan sawrkar chuan thuchhuah siamin thil thlen dan a sawifiah ve bawk a, Sawrkar thuchhuah tarlan danin The National Highways Act, 1956 Under Section 3D/3E-in a tarlan angin sawrkar hian he ramah hian thuneihna pumhlum a nei tawh nia sawiin, he rama Compensation latu hming chu Sawihara tiin Deputy Commissioner's Office record-ah hian tarlan a ni a. Competent Authority for Land Acquisition (CALA) chuan Rs. 8,25,268/- chu Sawihara hnena hlan turin a peih sa tawh a, mahse anni hian an Inhnuai chhût kim loh ni a sawiin, compensation hi a la duh lo a. Sawihara dilna angin assessment lak that niin Rs. 12,38,091/- in chhút chhuah sak a ni.
Sawihara assessment leh mi dang 41 assessment tharte hi DC Office/CALA chuan NHIDCL hnenah a thawn leh a. DC Office-in theihtawp a chhuahpui laiin NHIDCL hian heng assessment te hi a hnâwl sak vek a. Hetiang a nih avang hian ram neitute hian an In leh lo an chhuahsan duh loh avangin NHIDCL hian kawng zauh hna an thawk thei lo a, an harsatna hi Empowered Committee Meeting thla hmasa ni 17-a neihah NHIDCL hian a thlen a. Empowered Committee hian ram leh In laih chhiat ngai engemaw zat chu hmalak a ngaih thu leh hemi chungchang hi Arbitrator hian chingfel se a ti a. Hemi bawhzui zel hian Section 3E of National Highway Act, 1956 angin CALA Office chuan hma a la ta a ni.
Thudawn danin he In neitu Sawihara hi a thi tawh a, tunah hian a faten he In hi luah mekin, a fate zinga mi Lalhmangaihi hian a luah mek a ni.
Nimin vek khan Seling Bialtu MLA Prof. Lalnilawma chuan Seling khua hi tlawh nghalin thil thlen dan te a sawipui bawk a, Minister chuan thil awm dan hrang hrang a thlirna atangin Competent Authority For Land Aquisition (CALA) te leh ram neitute thu leh hla inhmuh tawn loh vanga hetiang thil lo thleng ta ni a a hriat thu a sawi a ni. He hunah hian Seling Bialtu Pastor Rev. V. Lalrozuala pawhin NHIDCL kawng laih meka BCM Seling Biak In hmun chungchanga an harsatna tawhte Minister hnenah hian a thlen a, an harsatna tawhte chu a chinfel dan kawng awm theite ngaihtuahpui turin a ngen bawk.
Seling khawtlang hruaitute leh Ram neitu, campensation a harsatna tawk mekte chuan Bialtu MLA in an harsatna te ngaihvena Seling khua a tlawh chu lawmawm an tih thu leh harsatna chinfel thuai an beisei thu an sawi a ni.