Income Tax pe lo pawhin TDS ngaihsak tul ti

Aizawl-a Income Tax Department hotute chuan Mizote chu Tribal an nihna angin Income Tax-in huam lo mahsela, sawrkar laipui dan zamin a phut anga TDS an ngaihsak a pawimawh thu an sawi.

Income Tax Department hotute chuan Income Tax-in a a huam loh India rama Tribal-te pawhin dan ang takin Tax Deduction Source bikah Tax Deduction Account Number an neih a ngaih thu sawiin, Mizote zingah Income Tax changchang ngai pawimawh an tlem nia a lan thu an sawi a, sawrkar hnathawk zingah Department tina Drawing and Disbursing Officer-te pawhin Income Tax chungchang hi an ngaih pawimawh a ngaih thu leh sumdawngte pawhin an sumdawnna kaihhnawih-a an Bank Account-a sum lut te uluk taka an chhinchhiah a pawimawh thu an sawi a. Mizote chu Tribal an nihna avang leh an sumdawnna hmun chu Tribal Area a nihna angin sawrkar-in Income Tax chawi tura a tuk ngawt theihna a awmlo a, chumi tur erawh chuan Tax Deduction Source mumal tak leh felfai tak an neih a pawimawh a, hemi atan hian Aizawl Bawgkawn Brigade-a awm Income Tax pisa-a thawktute an inpeih reng thu an sawi a ni.

Hei bakah hian Mizoram-a Kohhran tinte leh tlawmngai pawlte’n Bank Account an hawn chungchanga Income Tax Department hotuten an hriat tur pawimawh te pawh sawiin, Mizoram chhunga Kohhran leh Tlawmngai pawl hrang hrangten Bank Account an siamin Bank lamin PAN Card an lo phut thin a, hetah hian Kohrran leh tlawmngai pawl a sum enkawltute Pan Card lo thehlut mai thin an awm a, hei hi khawlin mimal Account emaw tiin Income Tax leh thildangah mimal Account angin a hmu thin a, Kohhran leh tlawmngai pawl tinten harsatna an tawh loh nan Kohhran emaw, tlawmngai pawl hminga PAN Card siam theuh turin Kohhran tin leh tlawmngai pawl tinte an hriattir thu an sawi bawk.