Aizawl-a National Press Day 2024 hmanna ah Sawrkar in Journalist Pension a siam tlangzarh a ni
Nimin Nov. 18, 2024 khan National Press Day 2024 pualin Aizawl-ah hun hman a ni a, he hunah hian I&PR Minister Dr. Vanlalthlana chuan Mizoram Sawrkarin Journalist Pension a duan thar chu tlangzarh nghalin Journalist Pensioner mi 8 (pariat) hnenah Journalist Pension Book a hlan nghal bawk.
I&PR Auditorium-a National Press Day 2024 puala hun hman ah hian I&PR Minister chuan tunlai khawvelah Technology-ah hmasawnna nasa tak awm mahse Journalist pawimawhna leh mawhphurhna a tlahniam chuang lova. Amaherawh chu, khawvel hmasawn zel leh thiamna thar mil turin Journalist te chu an intahhriam chhunzawm reng a ngai thung tih a sawi a. Ram hmasawnna kawngah ram hruaitute remhriatna leh thawhrimna a pawimawh rualin a nawrkal turin ram mipuite tuihalna leh rualawhna te a pawimawh takzet a. Mipuite rilru sukthlek dan herrem tur leh khawvel tukverha dahchhuah tira, hmasawnna kawnga tuihalna leh rualawhna dik an neih theihna turin Journalist ten mawhphurhna leh tihtur pawimawh tak an nei tih a sawi a. Thil chik, dilchhut leh hnuchhui kawngah Journalist te chu tan la chhunzawm zel turin a chah a. RTI hmang tangkai chhunzawm turin a chah tel bawk.
Minister chuan Misinformation – thuchhuah dik tawk lo leh Disinformation – tum reng vanga thudik lo dik anga chhuah luih chungchang leh nghawng tha lo a neih chungchang te sawiin, MJA te chu thudik leh tan lam neilo, huai taka an thil hriat te chhuah zel tur leh ram tana an mawhphurhna pawimawh tak te hre reng turin a chah bawk a ni.
Nimin-a I&PR Minister in a tlangzarh tak Mizoram Journalist Pension Scheme 2023 hi Mizoram sawrkar chuan Gazette kaltlangin October 5, 2023 khan a ti chhuak a. He Pension Scheme hnuaiah hian India khua leh tui dik tak, Mizorama chhung mi leh sa, Journalist hna kum 30 tal thawk tawh chuan kum 60 a tlin veleh, ama duh thu angin Journalist Pension hi a dil thei a ni. Mizoram Journalist Pension Scheme hnuaiah hian Pensioner hian thlatin Rs. 8500/- thlabi hlawh a la thei dawn a. Minister hian mi 8 hnenah Journalist Pension Book a hlan nghal a ni.
National Press Day hi kumtin November 16-ah hman thin a ni a, kumin hian remchan zawkna avangin November 18-ah hman niin nimin a he hun hman hi I&PR Director C. Lalnunkima chuan a kaihruai a, MJA President C. Lalram-buatsaiha chuan he ni thupui, ‘Changing Nature of Press’ tih hmanga thu sawiin, Dr David C.Vanlalfakawma, Department of Forestry, MZU chuan ‘Journalism in the face of the environmental crisis’ tih thupui hmangin kan chhehvel boruak, leilung, nungcha leh ramngaw chereu mek zelah Journalist te hma an lak a tul zia a sawi bawk.