Serchhip District-ah Vawk 10,560 chan a ni tawh
AH & Vety Department chhinchhiahna atanga a lan danin kumin chhung hian Serchhip District-a khaw leh Veng 31-ah vawk hri, African Swine Fever (ASF) hri hi leng tawhin chhungkaw 2123 ten harsatna an tawk tawh a, nimin thleng khan ASF vanga Vawk thi 3509 awmin Vawk 7051 suat a ni tawh bawk a, ASF avanga Vawk thi leh suat hi a vaiin 10,.560 a tling tawh a ni.
Chhinchhiahna atanga a lan danin Inrinni khan Chhuanthar Tlangnuam-ah ASF vanga Vawk thi 6 chhinchhiah belh leh awmin nimin-ah Vawk thi chhinchhiah belh a awm lo a. Inrinni vek khan Baktawng khua ah Vawk pahnih suat niin nimin khan Vawk pahnih an suat leh bawk a ni.
Hetihlai hian nimin khan Mizoram hmun hrang hrangah ASF avanga Vawk thi chhinchhiah thar a awm lo thung a, AH&Vety Department hotute chuan kumin-a Mizoram-a ASF hri leng avanga Vawk thi chhinchhiah hi ni khat-ah tam deuh chang leh tlem deuh chang te a awm thin tih sawiin, kumin February ni 9-a Champhai District chhung Leithum khua a ASF avanga Vawk thi a awm hnuah nimin kha Vawk thi awm lohna ni hmasa ber a nih thu an sawi a. Nimin thleng khan kumin chhunga ASF avanga Vawk thi hi 14,699 tling tawhin Vawk 23,941 suat a ni tawh bawk a ni.