Raltlan te tanpuina tur Buhfai rawn phurlut tan tawh

Mizoram-a raltlan 40,000 chuang awmte tana Central sawrkar in cheng vbc. 5 hu buhfai a pek tur chu Supply Department in Mizoram-ah a phurlut tan tawh.

Food, Civil Supplies and Consumer Affairs Department hotute sawi danin sawrkar laipuiin buhfai a pek tur hi phurhluh tan a ni tawh a, heng buhfai phurhluh te hi Department in District tina Kudam a siam ah te dah a ni dawn tih a, Home Department thuneihna in buhfai khawl te chu semchhuah a ni ang. Home Department chuan Mizoram District 11-a raltlante hnena sem dan tur bithliah fel tak a siam tawh a, Department hian cheng vbc. 5 hu buhfai MT 1,379.34 rit chu Mizorama raltlan hmun hrang hranga awm te hnenah a semchhuak dawn a ni.

Sawrkar laipuiin raltlante buhfai a pek tur man cheng vbc. 5 hi Ministry of Home Affairs in Ministry of Food and Public Distribution hnenah a pe dawn a, buhfai lakluh chungchangah erawh Mizoram Supply Department in an buaipui thung dawn a. Tun dinhmunah Myanmar raltlan mi 33,004 Mizoram-ah an awm mek a, Bangladesh atanga raltlan rawn lut 2,014 awmin Manipur lam mi hi 4,200 chuang hret awm anga chhinchhiah a ni.