Serchhip District chhunga bawlhhlawh sawngbawl dan tur leh faina beihpui thlak dan tur rel a ni

Serchhip District chhunga bawlhhlawh sawngbawl dan tur leh faina beihpui neih chhunzawm dan tur chu nimin khan District Bawrhsap Paul L. Khuma hovin sawiho a ni.

Nimin a thutkhawm Serchhip DC Meeting Hall-a neih ah hian Serchhip Bawrhsap Paul L. Khuma chuan Serchhip District chu Mizoram chhunga District fai ber nih tuma tan lak mek a nih thu leh Department hrang hrang te, Village Council te, tlawmngai pawl - YMA, MHIP, MUP leh a dangte thawhhona tur ‘Convergence Plan for Solid Waste Management’ chu Serchhip District-a a vawikhatna tura kalpui a ni dawn tih a sawi a. He ruahmanna hi mumal leh chipchiar taka duan a ni tih sawiin, Mizorama District dangah pawh an la tih ngai loh, Serchhip District in hmahruaitu ni tura Convergence Plan khawr pum a ni ta chu lawmawm a tih thu a sawi a ni. Bawrhsap chuan Convergence Plan-in a tum ber, faina kawnga hmahruaitu ‘Clean Serchhip District’ a taka kan neih theih nan Serchhip District mipui zawng zawng te theihtawp chhuah turin a sawm bawk a ni.

He thutkhawm ah hian Addl. DC Lalrinzuala buatsaih ‘Convergence Plan for Solid Waste Management in Serchhip District’ tih chu zirho niin pawm a ni a, Serchhip District chhunga Department kaihhnawih te, tlawmngai pawl leh khawtlang hruaitu aiawh ten hming an ziah hnan a ni. Serchhip District huamchhung khaw hrang hranga bawlhhlawh sawngbawl dan tur leh faina chungchanga ruahmanna hi kum khat (1) chhung ngawrh taka kalpui a ni dawn a. Faina chungchang inzirtirna te, bawlhhlawh thliarhran chungchang inzirtirna te, bawlhhlawh siam tam lo zawnga chhungtin te khawsak dan tur te leh a kaihhnawih inzirtirna te neih a ni dawn a. College-ah leh School zirlaite zingah te; Kohhran leh Sunday School-ah te, mipui kalkhawma Gram Sabha neihna hmunah te bawlhhlawh thliar hran leh faina chungchanga inzirtirna te kalpui thin a ni ang.

Serchhip District hman tur Solid Waste Management Centre hi sak thuai a nih dawn avangin hemi tinzawn hian hmalakna lian tham taka kalpui a ni dawn a. Chhungtin ten mahni In-ah theuh bawlhhlawh tawih thei leh tawih thei lo thliarhran dan tur hi an lo zir lawk a, a tak taka an kalpui thuai theih nan hemi chungchanga inhrilhriatna leh inzirtirna hi uar taka kalpui a ni ang.

Nimin-a thutkhawm ah hian Serchhip District-a sawrkar Department thenkhat hotute bakah Joint VC, Serchhip District VC Association, MUP, MHIP leh YMA hruaitute telin he Cnvergence Plan hi tha taka kalpui a nih theih nan hming an ziahhnan bawk a ni.