Serchhip-ah Down’s Syndrome chungchang inhrilhhriatna hun buatsaih a ni

Mizoram Down’s Syndrome Association buatsaihin nimin khan Serchhip Kawnpui VC Hall-ah Awareness Campaign neih a ni a, he hun hi Serchhip District Bawrhsap Paul. L. Khuma chuan khuallian niin a hmanpui a ni.

Mizoram Down’s Syndrome Association-a Fin. Secretary ZR. Thafala kaihhruai he hunah hian Bawrhsap chuan mihring te chu pianphunga inang tlang vek kan nih lohna hi khawvel tifamkimtu a ni tih sawiin, March ni 21 chu World Down’s Syndrome Day atan hman thin a nih thu leh Down’s Syndrome chungchang inhrilhhriatna hun atan an hman thin thu a sawi a, he ni hi Down’s Syndrome naupangte kan zahna ni atan te leh khawtlangin enhrang lovin huang khata awm tlang vek kan ni tih lantirna ni atan te hman thin a ni, a ti a. “Down’s Syndrome chungchanga awareness kan neih chuan anmahni enkawl tura chakna kan lo nei anga, a tha zawngin danglamna kan thlen thei dawn a; an dinhmun kan hriatchian hian an harsatna kan hriatthiampui dawn a ni,” tiin Awareness Campaign neih tulzia a sawi a. An chungchanga awareness kan neihin a thlen chu hriselna kawnga inenkawlna ah te, zirna ah te leh ei bar zawnna kawngahte Down’s Syndrome naupang te hi a chawisang dawn tih a sawi bawk. Bawrhsap chuan UN in a tarlan danin naupiang 1000 zela 1 hi Down’s Syndrome an ni tihm pawh sawiin, “Mi dangte ta ah kan dah ngawt thei lova, kan ta a ni thei; chuvangin, awareness kan neih theuh a tul a ni,” a ti bawk.

He hunah hian MDSA President R Zaihmingthangi chuan Down’s Syndrome hi natna ni lovin nihna a ni tih sawiin, Chromosome-a Cell awm tur zat aia tam a lo awm avanga neih a nih thu a sawi a. Nu leh pa in an fate nihna an pawm theih nan an pian hlima inhrilhhriat a that thu sawiin, “Down Syndrome naupangte hi an rualpuite aiin an hnufum zel thin a, tawngtheilo an ni lova, mahse tawng an harsat a, a enkawlnaa pawimawh ber chu an nihna pawm hi a ni,” a ti a, ei leh in, zun leh ek leh mahni inthuam thei tura zirtir a pawimawh thu a sawi bawk.

Nimin-a he hun hman ah hian MDSA Committee Member Lalhlimpuii Ngente chuan report pein MDSA hi October 2022-a din tan a ni a, a tum chu Down’s Syndrome avanga harsatna nei ten nunphung pangngai an neih theih nana hmalak te, nu leh pa bangbo tak takte an awm avangin an fate an enkawl thiam theih nana hrilhhriat te a nih thu a sawi bawk a. Shalom Special School, Serchhip naupangte leh Down’s Syndrome naupangte atangin Special Item neih a ni a. Down’s Syndrome chungchanga zawhna leh chhanna hun hman a ni bawk.