Dan lova Learner leh Driving License siamtu te lakah hma la turin YMA in Minister an ngen

Central YMA chuan Transport Department hnuaia Aizawl DTO Office atangin dan lova Learner leh Driving Licence pekchhuah awm ngei nia an hriat chungchang ah nimin khan Transport Minister Vanlalhlana hnenah hma laksak tura ngenna lehkha an thehlut.

Tun thla ni 14 zan-a Central Executive Committee (CEC) thukhawm in thutlukna a siam angin nimin khan Transport Minister hi hmuin tunhnai, hun engemaw chen kalta atang khan mi thenkhatte leh raltlan zinga mi thenkhatten Driving License awlsam taka an nei mai thei thin chu chhui chiangin, mi engemaw zat kawm chian an ni tih an sawi a. Heta tanga an thil hmuhchhuah chu, Mizoram mi leh sa dik tak zinga mi thenkhatte leh District Transport Officer (DTO) a thawktute in thurualin, danin a phut anga Learner leh Driving Licence nei thei tura lehkha pawimawh (documents) thil tel ngai nei lo te hnenah Learner leh Driving Licence pekchhuah a ni ngei tih finfiah a ni tih an sawi a ni. Hemi chungchanga Central YMA hruaitute tarlan danin, Learner leh Driving Licence siam duhte chuan hetiang siam theia in sawi (commission) ho hnenah document engmah pek ngai loin an bituk zat pawisa tam tham deuh zawk an pe a, anni hian Aizawl DTO-a thawktute hnenah a pangngaia pawisa chawi ngai aia tam pe ve lehin anni hian an lo siam sak thin a ni.

Hetianga pawn lam mi Learners leh Driving Licence siam sak theitu ten Department lama thawktute pawisa an pekna evidence pawh Transport Minister Vanlalhlana hnenah hian an hlan nghal bawk a, Mizoram khawpui ber, Aizawl-a DTO Office-in hetianga an tih theih chuan District dangah pawh hlauhthawn an neih len viau thu an sawi bawk a ni.

Central YMA hruaitute chuan Transport Department hnuaia dik lo taka Learner leh Driving Licence pekchhuaha inhnamhnawite chu dan anga na taka hrem tura phutin, danin a phut documents engmah nei lo leh Driving Test pawh paltlang miah lova Driving Licence pekchhuah mi engemaw zat an awm tawh chu a him loh avanga cancel leh turin leh tunhnua hetiang a thlen tawh loh nana rang taka hmalaksak turin Minister hi an ngen bawk a ni.

Heng bakah hian Central YMA hruaitute chuan ruihhlo phur thin Maxi Cab leh Public Carrier te ruihhlo an phurh nen man te chu an license cancel tur te; hnamdang motor, State dang registration nei leh mihring phur tur ni lo te passenger phura an thlan thin chungchang leh Garrage neih vek chungchangte Minister hnenah hian an thlen bawk a ni.