Sawrkar Quarters sakna tur lungphum CS in a phum

Chief Secretary Dr. Renu Sharma IAS chuan nimin khan Aizawl MINECO Plot No. B-41, MYC bul-a Senhri Run, Govt. Residential Quarters Type V leh Type VI sakna tur lungphum a phum.

Hemi puala inkhawm tawi MYC Conference hall-a neih ah Chief Secretary chuan Mizoram Sawrkar hnuaia hna pawimawh tak tak chelh Mizoram-a awm te tana Residential Quarters sakna tur lungphum phum theiha a awm chu lawmawm a tih thu a sawi a. Sawrkar hnuaia Officials-te'n an chenna tur Quarters tha tak an nei thin hian an hnathawhna kawngah lung-muanna, thathona leh nasa lehzuala inpekna an neih phahna a nih a beisei thu a sawi a ni. Chief Secretary chuan Sawrkara thawktute chuan an phu tawk, an khawsak awlsamna tura an mamawh (Basic Needs) an dawn ngei chu an chanvo a nih angin inthlahrung lo turin a chah a, an hnathawhna a an insawrbing theihna atana puitu a nih zawk thin thu a sawi a. Ram pawna an colleague te lakah pawh insit lo tur leh mahni inrintawkna (Self Esteem) pholangtu he residential quarters sak tur hi ni ngei se a duh thu a sawi bawk a ni. 

He hunah hian PWD changtu Commissioner & Secretary K. Lalthawmmawia’n Report pe-a a tarlan danin Type V leh VI Quarters sakna tur sum hi Special Assistance to State Capital Investment (2024-25) Part-I hnuaiah hmuh niin sum Sanction zat hi cheng vbc. 15.42 a ni a. Type V Quarter (4 units) (1 unit per floor) hi a pumpuia a zau zawng tur hi 1066.85 sqm niin Basement-I, Ground floor, First floor, Second floor leh Third floor zau zawng tur hi 213.37 sq.m vek ni tura ruahman a ni. Type VI Quarter (4 units) (1 unit per floor) hi a pumpuia a zau zawng tur hi 1245.39 sq.m tur niin Ground Floor, First Floor, Second Floor leh Third Floor te zau zawng hi 250.00 sq.m tur a ni.