Assam Rifles ten check an tum loh thu leh tumah an check loh thu Power Minister in a sawi

Niminpiah khan Power Minister F. Rodingliana zin haw chu Tuirial bulah Assam Rifles ten lo tidingin inhnialbuaina a thleng a, hemi chungchangah hian Power Minister chuan Assam Rifles te chuan check an tum loh thu leh tumah an check loh thu a sawi.

Niminpiah-a thil thleng chungchangah hian P&E Minister F. Rodingliana chuan thuchhuah siamin October ni 12, 2024 khan a Bial fang chu Kawlbem daiah Assam Rifles sipai pathumin lo tidingin, National Flag leh a Designation a kawhhmuh hnuah pawh kaltlang an phal chuan loh thu leh a tidingtu chuan Zu a ruih thu a tarlang a, chuvang chuan thu zawhfiah turin Police-in an la ta tih tarlang bawkin, Sipai pawh chu Case engmah siam lovin Police-te'n an chhuah leh thu a tarlang a. Ngopa-a an Company Commander hnenah thil awmzia sawiho turin Civil SDO-in ziakin sawm mah se an rawn kal loh thu a tarlang bawk.

Minister chuan October ni 14 khan Kawlkulh lama Bial fang chhunzawm tura Ngopa atanga an chhuak chu Ngopa dai, Check Point awm ngai lohnaah lo dan an tum thu leh hemi tum hi chuan an tlan tlang luih thu tarlangin, niminpiah, October ni 17-a Champhai atanga Aizawl an haw lam chu Keifang an pna laiin a PSO te'n Police VIP Cell atanga Phone Call dawngin Seling-ah Assam Rifles-te'n lo tihdin an tum thu an hrilh a, Seling-a AR Gate bulah Mizoram Police duty an lo awm avangin harsatna an tawk zui lo tih a tarlang a. Chawhnu dar 1:30 velah Bungbangla leh Beraw lui inkar quarry thlen hmaah AR-te chuan kawnglaiah hmun hnihah barrel hmanga kawng danna an siam bakah Spike Nail an lo phah bawk a, an hmaah sipai pathum silai nen an lo ding bawk tih sawiin, PSO-in thu a zawh chian hnuah an Commander thu anga dang an nih thu an hrilh a, engemaw chen an inhnial buai a, mipui an punkhawm hnuah an Captain chuan chhuah turin a ti a, an tihdin chhan a hriat phawt loh chuan a ding ta tih a tarlang bawk a ni.

Hemi chungchangah hian MNF Legislature Party chuan nimin khan thuchhuah siamin Power Minister F. Rodingliana chunga Assam Rifles chet dan chu an dem tih an tarlang a. MNF Legislature Party chuan 2nd Bn Assam Rifle-te'n Power Minister chu zah lo tak leh a programme tibuai a, kan ram chhung kawng ngeia rei tak ralthuam nena rikrap a, an dang khawtlai chu pawi an tih thu tarlangin, Mizo hnam leh Democracy zah lohnaah ah ngai tih an sawi a, 2nd Bn Assam Rifle-te chu an dem takzet a ni, an ti.

MPCC President Lal Thanzara pawhin he thil thleng hi lungchhiatthlak a tih thu nimin khan Congress Bhavan-ah sawiin, “Kan sawrkar hian he thil thleng hi rang takin a chhan leh a vang chhuichhuak se, hma la se kan duh a, Assam Rifles hotute pawh hian hetia kan Minister an tibuai hi hekna leh thildang a awm anih chuan mipui hriatah puangzar turin kan phut a ni,” a ti bawk.