Mizoram-a ITI tihchangtlun nan thawhdunna tur ziakfel

Labour, Employment, Skill Development & Entrepreneurship (LESDE) Department changtu Minister Lalnghinlova Hmar hovin nimin khan LESDE Department Official leh Schneider Electric India Foundation (SEIF) aiawhte chuan Mizoram-a Industrial Training Institute (ITI) te tihchangtlun dan tur leh Skill Development leh Entrepreneurship-a Mizo thalaite hmasawnna tur chungchang an sawiho a. Mizoram ITI pathum-a Laboratory changtlung tak din tura thawhdunna tur (Letter of Intent) chu nimin khan ziah nghal a ni.

LESDE Minister Office-a he sawihona hunah hian LESDE Minister Lalnghinglova Hmar chuan LESDE Department leh Schneider Electric India Foundation in thawhhona tha tak an nei tur chu lawmawm a tih thu sawiin, ITI bakah College leh zirna In dangah pawh a remchan dan anga la thawhho zel a duh thu a sawi bawk.

LESDE Minister chuan Mizo thalaite’n Skill-ah theihna sang tak an nei tih sawiin, IndiaSkills Competition hnunhnung berah Medal 8 (pariat) la in Northeast State zinga tttha ber an ni a. Lyon, France-a WorldSkills Competition, 2024 ah pawh India aiawhin Mizo thalai pahnih an tel tih a sawi a. SEIF aiawhte pawhin ITI piah lamah pawh zau zawka Mizo thalaite hmasawnna’n thawhho zel tha an tih thu an sawi bawk a ni.

LESDE Department leh SEIF te thawh-dunna turah hian Mizoram-a ITI pathum Aizawl, Lunglei leh Siaha-a Electrical, Solar leh Industry Automation course zirna tur laboratory changtlung tak din a ni ang a, Laboratory din leh tihhmasawn nana sum mamawh chu SEIF in a tum dawn a ni. Heng Course zirtirtu tur ITI-a thawk (instructor) te tan SEIF in training a buatsaih anga, ITI zirlaite tan Entrepreneurship Training leh Awareness Session buatsaih thin a ni bawk ang. Bengaluru-a SEIF Entrepreneurship Incubation Centre-ah ITI zirlai tam zawk an intuaihriam theih nan an thawkdun dawn bawk a ni.