Mamit-ah Career Awareness Campaign neih a ni

Nimin khan Mamit-ah SCERT bultumin ‘Career Awareness Campaign for High School Students of Mamit’ neih a ni a, hetiang hun hi Mizoram hmun hrang hrangah neih tura ruahman a ni.

Mamit Chhim Veng YMA Hall-a he hun hman hi Mamit DC Jacob Lalawmpuia chuan khual-lian nia hmanpuiin Mamit chu Sawrkar laipuiin District hnufual chawikan ngai, Aspirational District 115 a thlanchhuah te zinga pakhat a ni a, hemi Sector atana pawimawh em em chu Education a ni tih a sawi a, SCERT bultuma hetiang hun buatsaih a ni chu lawmawm a tih thu a sawi a. Bawrhsap chuan zirna lama MOC (Mamit Officers Club), District Administration te hmalakna teltu ber chu zirlaite an nih thu pawh a sawi bawk a ni.

Mamit DC Jacob Lalawmpuia chuan zirlaite chu thil pawimawh pahnih, an nun a vawng reng tur chahin, pakhatna ah lifeskills -nu leh pa thuawih leh aia upa te zah a nih thu leh, hemi tel lo chuan nun tha a neih theih loh tih a sawi a. Pahnihna ah hrehawm tuar peih tur a inbuatsaih a tul thu sawiin, hlawhtling tur chuan teirei peih a, hrehawm tuar huama lehkha zir a tul thu leh thahnem ngai leh dawhthei taka hlawhtlin tum turin a chah a ni.

Nimin-a he hun hman hi Mamit-ah Addl. DPC Emmanuel-a chuan kaihruaiin DIET Mamit-a Vice Principal K Malsawmhlua chuan he hun buatsaih a nih chhan te a sawi a. Chawhnu lamah Session II hmangin, hetah hian zirlaite tana hriattur pawimawh hrang hrang- Carrer Planning te, Vocational Education/Skill Development, Career in Arts, Science & Commerce, Entrepreneurship leh NTA chungchang te sawi a ni a, he hun hi SCERT-a Lecturer ten an kaihruai ve thung a ni. He hun hman ah hian Mamit-a School paruk atangin zirlai 379 leh zirtirtute bakah MZP hruaitute pawh an tel a ni.