Sawrkar tharah hna lak chungchangah Party induhsakna a awm lo - Deputy Speaker

Assembly Deputy Speaker Lalfamkima chuan Sawrkar tharah hna lak chungchangah party induhsakna a awm lo niin a sawi.

Mizoram Youth Commission Coaching Centre, Kolasib, 2024 Session hawnna nimin-a MYC Coaching Centre building, Kolasib-a neih a hmanpuina ah Deputy Speaker Lalfamkima chuan Sawrkar tharah hna lak chungchang ah party induhsakna a awm lo tih sawiin, “A thiam leh tha apiang lak an ni a, chuvangin thiamna nei tak takte tan zau zawkin hun a in hawng zel a ni,” a ti a. Hlawhtling tur chuan tihtak takna a pawimawh tih sawiin, Lal Isua zuitu an nih chuan an thiltih zawng zawng ah tihtak meuha ti zel tura zirtir an nih thu a sawi bawk a ni. Kolasib bialtu MLA ni bawk chuan Kolasib Bialtu MLA hmasa in Kolasib-ah MYC Coaching Centre an neih theih nan hma a lo lak tawh thu pawh sawiin, hun en emaw chen hman tangkai tawk loh a nih hnuah an tharthawh leh tur chu a lawmawm hle tih a sawi a. Kolasib chu khaw nuam tak ni mah se thalai rualte pawhin an awm danah duhtawk mai lova rual elna nena Competitive Exam te pawh an hmachhawn a ngai tih an hriat a ngai tih a sawi a. “An hlawhtlin lohna chhan chu an thiam loh vang ai mahin, rualawhna leh midang elna nei lova competition an hmachhawn thin vang ni zawkin a lang a ni,” a ti bawk.

Kolasib MYC Coaching Centre-ah hian Coordinator Lalnunhlua, LDC pakhat leh Peon pakhat awmin Dr Lallianzuali Chhangte (History) leh Vanlalmalsawma (Economics), Govt Kolasib College ve ve bakah Zoremmuana Ralte (Economics), DRO, Kolasib te chu faculty an ni a. September - December, 2024 Session chhunga zir turin Admission ti zirlai 10 an awm mek a. Coaching Class hi Govt. Kolasib College-ah neih thin tur a ni.