ASEP in Ramsial humhalh turin ngenna an siam

Association for Environmental Preservation (ASEP) chuan Phulpui, Maubuang, Sumsuih leh Thiak ramte kartawna awm mek Ramsial humhalh a nih theih nan nimin khan heng khaw hrang hrangte hi an tlawh a, Ramsial chu a awm ngei nia a lan thu leh a rual ni lovin a maltlat nia hriat a nih thu an sawi a. Mizoram-a ramsa hmuh tur vang tawh tak Ramsial a lo la awm chu ASEP chuan lawmawm an tih thu sawiin, tu kut palh mah a tawrh loh nan humhalh tlat turin heng khaw 4-a VC leh YMA-ah ngenna lehkha an pe a, heng khuate pawh hian theihtawpa humhalh an tum thu an sawi a ni. ASEP chuan Ramsial hi Nungcha Humhalhna Dan The Wildlife (Protection) Act, 1972-ah Schedule-I zinga awm a nih thu leh Dan zawm lo te chu kum 3 aia tlem lo tan theihna leh pawisa chawi theihna a nih thu an sawi bawk.