Handholding-ah mi 2396 an inziaklut tawh

Adviser to Chief Minister Dr. KC. Malsawmzauva chuan nimin, Oct. 21, 2024 thleng khan Handholding hnuaia Entrepreneurship inziaklut tawh chu mi 2396 an tling tawh tih a sawi.

Nimin khan Aizawl-a ZPM Office-ah Adviser to Chief Minister Dr. KC. Malsawmzauva hian handholding Scheme chungchang hi sawiin, Handholding Scheme hnuaia peng panga (5) awm zinga mipui nawlpui ten kan chhawr tangkai tur leh a lian ber ber pahnih chu Thlai thar hralh (Market handholding) leh Eizawnna bul tan turte tana Loan (Entrepreneurship Handholding) te a nih thu a sawi a. “Tunah hian thlai thar hralh hnuaiah kuthnathawktu chhungkaw 36821 chuang an inziaklut tawh a, eizawnna bul tan tur thalai mi 2396 ten Project an thehlut tawh a, Aizawl District atangin inziaklut an thahnem ber a, mi 555 inziaklut tawhin, a dawttu Lawngtlai District atangin mi 338 ten project an thehlut tawh bawk,” tiin diltu ngah ber Department chu Commerce & Industry niin dilna 907 a luh tawh thu leh a dawt chu Animal Husbandry & Veterinary niin dilna 821 a luh tawh thu a sawi bawk.

Entrepreneurship Handholding hi a bul tan nan Bank pathumte nen tangkawpa kalpui a ni dawn tih pawh Adviser to Chief Minister chuan sawiin, “State Bank of India (SBI), Mizoram Rural Bank (MRB) leh Apex Bank te nen he Project-ah hian kan thawkho dawn a ni,” a ti a. “He Scheme hnuaiah hian pawl ang leh mimal angin a inziahluh theih a, Pawl aiawha hming zikluttu pawhin mimal ang pawhin dilna a hranin a thehlut thei tho dawn a, chutih rualin mimal project a nih chuan mi pakhat in dilna pakhat bak a thehluh theih loh thung a ni,” a ti.

Hei bakah hian a dilna System pawh tihhmasawn zel a nih thu sawiin, dilna thehlut ten confirmation Whatsapp kaltlangin an dawng zel tawh dawn tih a sawi a, “System-ah mahni project mil Trade thlan tur a awm mai lo te tan ‘OTHER’ tih dah tel a ni a, hei hi thlan mai tur a ni. Dilna thehlut tawh pending a la awmte tan pawh buaina tur a awm lova, Department lamin a tahtawlin an lo en zel dawn a, a khat tawka website tlawh fo tur a ni,” a ti a. CM Special Pakage pawh website-ah download a print chhuah mai theihin dah a nih thu leh fill up zawh hnuah CM Office-ah thehluh mai tur a ni tih a sawi a, “Mahni kher kal lo pawhin aiawhte pawh a thehluh tir theih a ni,”a ti bawk.

Dr. KC. Malsawmzauva chuan, “Handholding Scheme hi ram siamthat tumna project a nih avangin party politics anga kalpui a rem ve lo a, tawngtaina nen Pathian malsawm tlaka kan kalpui a ngai a, campaign laia kan au hlate hre rengin dik leh thianghlim taka he Scheme hi kan ram hmasawn nan kan kalpui a tul a ni,” tiin tun atang kum 5-ah chuan he Scheme rahchhuah hmasawna hmuh ngei a beisei tih a sawi bawk.