Vety Minister in Mizoram mamawh hrang hrang thlen

Ministry of Animal Husbandry & Dairying buatsaihin India rama AH&Vety Minister te intawhkhawmna chu nimin khan neih a ni a, he hunah hian Mizoram atangin AH&Vety Minister C. Lalsawivunga chu telin Mizoram mamawh leh hmalakna te a tarlang a ni.

India rama AH&Vety Minister te intawhkhawmna, 'Monsoon Meet' hi Odisha khawpui Bhubaneswar-a Lok Seva Bhawan Convention Centre-ah neih a ni a, Union Minister for Fisheries, Animal Husbandry and Dairying Rajiv Ranjan Singh chu khuallian niin he Monsoon Meet hi ranvulha eizawnna leh bawnghnute tharchhuahna kawnga sawrkar hmalakna hrang hrangte sawt zawkna tihhlawhtlin a nih theih nana Sawrkar laipui, State leh UT te inrawnkhawmna leh sawikhawmna a ni.

Monsoon Meet-ah hian Mizoram atanga tel AH&Vety Minister C. Lalsawivunga chuan Mobile Veterinary Unit hnuaia mi chhawrte hlawh Govt. of India atanga release thuai a tul thu te, ASF in Mizoram State a tuam avanga kan tawrh nasatzia te, ranvulhtute chhawmdawl an ngaih thu te sawiin, Central sawrkar chu hma laksak turin leh Caccine rang taka siam emaw, ramdang atanga lakluh dan kawng dap turin a ngen a. Hri leng awm thar tur ven leh hriselna kawnga sawrkar laipui in chak taka hma a laknaah Mizoram sawrkar pawhin theihtawp a chhuah mek thu leh a chhuah zel tur thu a sawi a ni.