Handholding Scheme inhrilhhriatna neih a ni

Tun thla-a hawn hman tura ruahman Mizoram sawrkar Flagship Programme Hand Holding Scheme chungchang inhrilhhriatna chu nimin khan Ministers leh sawm bik te pualin neih a ni.

Mizoram State Policy Coordination Committee buatsaiha Planning & Programme Implementation Conference Hall-a he hun hman hi Chief Minister Lalduhoma chuan hmanpuiin Ban-a Kaih Scheme a taka kalpui a ni thei hnai ta chu lawmawm a tih thu a sawi a. Kumin bik hi chu Pilot Phase angin an kal phawt anga, nakum atang chuan lian taka kalpui an tum ang tih a sawi a ni.

He hunah hian Dr. KC Lalmalsawmzauva chuan Handholding Scheme atana inbuatsaih dan leh he hun an buatsaih chhan te sawiin, MSPCC Member Secretary Lalmalsawma Pachuau chuan he Scheme kalpui dan tur a sawifiah a. He Scheme Apex Body chu Mizoram State Policy Coordination Committee niin Nodal Department thlanchhuah te hmanga kalpui tur Component panga (5) nei a ni anga. Hmalakna chhawrtute hi beneficiary ti lovin Progress Partner tih tur an ni a, dil tur niin thawhpui tur hi Line department ten an thlang anga, Training leh thil tul dang apiang an tihpui anga, hma an lakna tinah an kaihruai dawn a ni. He hunah hian ICT-a Informatic Officer C. Lalrinfela chuan Handholding Scheme Portal a sawifiah bawk.

Thlai thar lei dan tur ruahmanna pawh he hunah hian inhrilhhriat nghal a ni a. Sawrkar chuan ruahmanna a lo siam tawh angin thlai thlanchhuah pali (4) te chu a tul ang zela Support Price pek ngei a nih dawn thu tarlan a ni.