Mizoram CSR Cell te an hmalakna thlirin an thukhawm

Mizoram CSR Cell chu nimin khan an Chairman leh Adviser to Chief Minsiter TBC. Lalvenchhunga hovin a Pisa-ah an thukhawm a, hmalak dan tur hrang hrang sawiho a ni.

CSR Cell te hian kum 2024 chhunga an thawh tur hna bituk (road map) fel tak an duang a. Chungte chu thla bi-a tihhlawhtlin tur chin thliar sin lehin, an hmachhawp hmasa CSR Database changtlung tak siam tura mawhphurhna pek ten meeting-ah hian report an pe a. CSR Funding Source lam Database hi an zo thawkhat tawh a ni. Tunah hian Mizoram-a CSR fund hmanga thawh theih chi Investible Projects/Concept Paper an khawnkhawm leh tur a ni a. Chumi zawh chuan Capacity Building/Sensitization kalpui leh a ni anga. UNDP in Mizoram-a CSR kaltlanga hmalakna tam zawk a awm theih nana Bangalore khawpuia programme neih an rawtna pawh meeting hian a remti bawk.

Mizoram-ah CSR Fund rawn pe duh engemawzat awm mah se dan ang taka lo dawng thei turin chak taka hmalak zel a ni a. A bikin project lian hote lo dawnna tur Trust din tura hmalakna te pawh kalpui a ni a. CSR Fund hmu mek te, dil tum leh dil mekten an hmalakna CSR Cell kaltlanga an tih zel a ngai hran lova. Amaherawh chu Mizorama CSR Fund chevel dinhmun chiang taka chhinchhiah a nih theih nan CSR Cell hi hrilhhriat thin tur a ni. Department, NGOs leh Trusts ten Mizoram tana CSR Fund a tam thei ang ber an haichhuah hi CSR Cell duh ber a ni a, Cell hi chu Facilitator hna thawktu a ni.

Non-Profit NGO ten tun aia CSR dawn lama hma kan sawn theih nan leh CSR dawng thei NGO tam zawk kan neih theih nan Income Tax Act 1961 hnuaia 12A emaw 80G Registration nei tawh leh nei tura buaipui mek te chuan cmo-csr@mizoram.gov.in-ah hian an NGO chungchang lehkha thehlut vek turin an ngen tih an tarlang bawk a ni.

Nimin-a thutkhawm ah hian Commissioner & Secretary to CM Vanlaldina Fanai leh Planning Secretary Lalmalsawma Pachuau bakah Member dangte an tel a ni.