Serchhip District-a MOVCD-NER Phase 4 kalpui dan tur Bawrhsap hovin sawiho a ni
Serchhip DC Meeting Hall-a DLMC for Mission Organic Value Chain Development for North Eastern Region (MOVCD-NER) thutkhawm hi an Chairman leh District Bawrhsap Paul L. Khuma chuan kaihruaiin DLMC Member Secretary leh Serchhip-a District Agriculture Officer (DAO) Lalchharliana chuan he Scheme chungchang leh loneituten an hlawkpui dan turte a sawifiah hmasa a. MOVCD-NER Scheme hnuaia Serchhip District bialtu Service Provider atana ruat Clover Organic Pvt. Ltd aiawhin an Project Manager Malsawmkimi chuan Powerpoint presentation hmangin Scheme chungchang a sawifiah a. Member kalkhawmte nen sawihona hun an hmang chhunzawm nghal a ni.
Mission Organic Value Chain Development for North Eastern Region (MOVCD-NER) Phase 4 hi Serchhip District-ah chuan Chhing-chhip leh a chhehvel khuate bakah East Lungdar Block huamchhungah kalpui a ni dawn a. He hmalakna kalpuina tur hian Farmer 500 vel thlang-chhuakin Sapthei (passion fruit) an ching dawn a. Clover Organic Pvt. Ltd. Company te hian zirchianna (survey) an kalpui anga. Farmer Interest Group (FIG) te nen thawkhoin beneficiary Selection chu an kutah a awm nghal dawn a ni.
MOVCD-NER hi Nation Mission for Sustainable Agriculture hnuaia India sawrkar hmalakna niin kum 2015-2016 atang khan hmar-chhak State te tan a kalpui a ni a. Kuthnathawktu ten hlawk zawk leh awmze nei zawka Organic farming an kalpui theihna tur te, eikhawp ngawr ngawr chauh thar thin te pawhin an thlai thar te hralh sum-a an chantira, sum lakluhna tha zawk an neih theihna tura ruahmanna niin Phase 3 thleng zawhfel a ni tawh a ni. Nmin-a thutkhawm ah hian Fisheries, Horticulture, ATMA, KVK, AH&Vety, Cooperation, Agriculture leh NA-BARD aiawhte an tel a ni.
Comments
Post a Comment