Mizoram-a ruang phurhna man chungchang Sawrkar leh Ambulance neitu ten la sawiho an tum

Mizoram sawrkarin tun thla, September 2024 atanga Mizoram-a hman tan tura a ruahman ruang phurhna rate chu ruang phurtu Ambulance te rate hman lai nen a inan loh avangin harsatna a awm deuh a, sawrkar leh Ambulance neitu ten hun remchang hmasaah an sawiho leh dawn a ni.

Tun thla, September ni 4 khan Social Welfare Minister Lalrinpuii chuan mitthi ruang phurh chu tun thla, September ni 1 atangin Mizoram pumpuiah sawrkarin mawh ah a la tawh dawn tih thuthar lakhawmtute a kawmna ah sawiin, ruang phurh nan budget ah cheng nuai 500 dah a nih thu leh ruang phurhna atan sawrkar hnuaia Motor inziaklut zinga Empanel te chu hman theih an ni dawn tih a lo sawi tawh a. Mizoram-a ruang phurhna man chungchang ah hian Minister Lalrinpuii chuan State Transport Authority (STA) in rate a siam ang leh ruang phurtu Ambulance rate a inan loh avangin an rate siam ang hian an tlan thei lo tih a sawi a, hei vang hian remchang hmasa berah sawiho an tum thu a sawi a ni.

Hetihlai hian Aizawl atanga hmun hrang hranga ruang phurh hna thawktu, Mizoram Private Ambulance Association (MPAA) President CVL. Ngheta pawhin Ruang phurhna rate chungchangah hian Social Welfare and Tribal Affairs Minister Lalrinpuii dawr an tum thu leh a zin avangin tunkar lam hian dawr chhunzawm an tum thu a sawi a. Sawrkar rate siam ang chuan an tan tlan ngaihna a awm lo tih sawiin, tun dinhmunah pawh anmahni rate siam KM khata Rs. 40 (a let lehna nen Rs.80) in an la tlan zel niin a sawi a. Tun dinhmunah Mizoram Private Ambulance Association (MPAA) ah hian member 13 an awm mek a, an vai hian Aizawl khawpuia khawsa vek an ni.

Social Welfare, Tribal Affairs, Women & Child Development Department in ruang phurhna atana ruahmanna a siam dan chuan lirthei nuai 7 hnuailam chu KM khatah Rs. 25, nuai 7 atanga nuai 12 inkarah Rs. 30 leh nuai 12 atanga 17 inkarah Rs. 35 te a ni a. Lirthei nuai 17 chuang man chu man chawia ruang phurhna atan STA chuan hman a remti lo a ni. Hetihlai hian ambulance hi km khatah Rs. 80 (up down) in an tlan mek a ni.

Sawrkar in ruang phurh man a tum turah hian ruang phurh tanna leh a dahna tur hi km 20 tal a ni tur a ni a, ruang phurh man hi Form siamsa hmangin sawrkar-ah bill tur niin sawrkar in rate a siam angin a rulh let tur a ni dawn a ni.