Serchhip District-ah HIV/AIDS/STI Awareness Campaign hawnna Bawrhsap hovin neih a ni
Intensive IEC Campaign - ‘India fight against HIV/AIDS & STI’ tia vuah HIV/AIDS leh mipat hmeichhiatna hman khawloh atanga inkaichhawn theih natna laka kan fihlim theih nana Awareness Campaign beihpuithlak hi India ram pumah neih niin Mizoram-ah pawh District hrang hrangah neih mek a ni a. Serchhip-ah chuan nimin zing khan HIV/AIDS Awareness Rally hmanga bul tan niin zirlaite leh mipui thahnem takin Serchhip AOC kawn atanga tanin Serchhip Auditorium thleng kawng an zawh a. Serchhip Auditorium-ah hian he beihpuithlak hawnna hun hi neih zui nghal a ni.
He beihpuithlakna hi Serchhip District Bawrhsap Paul. L. Khuma chuan hawngin, HIV/AIDS leh STI inkaichhawn dan te, heng natna laka inven dan te leh a dona kawnga hma kan lak dan te hi kan hriatchian a tulzia a sawi a. Natna tihbaiawm tak ni mah se, nun kan fimkhur chuan kan kai lo thei a ni tih hria a, tawng pawng hlauh loh tur a nih thu te leh a vei te pawh thinhrik mai loh tur a nih thu te a sawi a. He natna laka kan inven theihna kawng tha ber chu mipat hmeichhiatna hman khawloh laka fihlim te, damdawi tihchhin loh te, ruihhlo leh a kaihhnawih zawng zawng laka inven te a nih thu sawiin, tih chhin loh leh tih loh tawp hi invenna tha ber a ni, a ti.
He beihpuithlak hawnna hun hi District AIDS Control Officer Dr. Lalnunhlima Khiangte chuan kaihruaiin ICTC Counsellor leh OSTC Medical Officer ten kalkhawmte zirtirna hun an hmang a. He beihpuithlakna hi Vawiin-ah chhunzawmin Zirlai naupang te tan Musicial Drama Competition te, Debate te, Poster insiamsiak te buatsaih a ni dawn a, lawmman semna neih nghal tur a ni bawk ang.
Kum 1981 khan HIV/AIDS natna hi hmuhchhuah a ni a, South East Asia a he virus hmuh a nih hmasak ber chu Thailand-ah kum 1984 khan niin Mizoram-ah kum 1990 atanga September 2023 thleng khan HIV positive 29,514 an awm tawh a ni. Serchhip District-ah hian July 2003 atanga July 2024 chhung khan mi 49811 test zingah mi 621 positive hmuhchhuah a ni a, hei hi za zela chhutin 1.99% a ni a. Serchhip District pumpuiah kum 2023-2024 chhung hian HIV positive hmuhchhuah zat chu 84 a ni a, hei hi za zelah 2.8% a ni.
Comments
Post a Comment