Serchhip District-ah Social Audit neih a ni

Mizoram Society for Social Audit and Transparency (MSSAT) hnuaia Social Audit Unit te chuan nimin atang khan Serchhip District-ah MGNREGA Social Audit an nei tan.
MGNREGA hnuaia Social Audit hi tun thla ni 24 thleng khian Serchhip District chhunga khaw 18-ah neih tur niin MSSAT Social Audit Unit-a Director C. Laltleipuii hovin nimin khan New Serchhip North, Serchhip Dinthar Veng leh Serchhip Darnam Veng VC hnuaia hmalakna te chu a hmunah kalin enfiah a ni a, Serchhip BDO F. Lalnisai leh Official dangte bakah Village Council member te, tlawmngai pawl hruaitute leh mipuite an tel a, an hmalakna leh sum hman dan hrang hrangte enin tha zawka hna thawh zel dan turte pawh an sawi bawk.

Kumin July 29 khan Rural Development Secretary hovin Mizoram chhunga ni 100 inhlawhna, MGNREGA hnuaia thingtlang mi te leh mi harsa zawkte tana hamthatna te leh hmasawnna tur thil dang pawimawh te sawiho niin, hma an lo lak tawh dan te thlirletna leh an hmachhawpte sawiho a ni a. Hemi bawhzui hian Social Audit kalpui niin mipuiten MGNREGA hnathawh dan leh tangkai dan te zau zawka an hriat theih nan tlawmngai pawl te pawh Audit-ah hian an tel a ni.

Rural Development Department hnuaia hnathawh hrang hrangte langtlang tak leh mipui tan chhawr nahawm lehzuala kalpui a nih theih nan Social Audit Unit te hian MGNREGA bakah hian PMAY-G, NSAP etc. hnuaia hnathawh te an endik thin a. Vantlang rorel (Gram Sabha) kaltlangin an hnathawhte chu kum khatah vawi hnih Audit thin niin hei hi dik tak leh langtlang taka hnathawh a nih zel theihna tura hmalakna a ni. 

Nimin-a Social Audit neih a nih rual hian Vantlang Inkhawm (Gram Sabha) koh nghal niin mipui te hnenah an dikna chanvo leh hna kalpui dan te hriattir an ni a, hriatloh avanga hamthatna dawng thei tur ni si, lo dawng lo palh te hnenah hriattir an ni bawk.