NEC Vision 2047 chungchang ngaihtuahin State Level Consultative Committee te thukhawm

Nimin khan Aijal Club-ah NEDFi, North Eastern Council (NEC) leh Ministry of Development of North Eastern Region (DoNER) te tangkawp buatsaihin Aizawl-ah NEC Vision 2047 chungchang ngaihtuahin State Level Consultative Committee thutkhawm neih a ni.

He thutkhawm ah hian Planning & Programme Implementation Department Additional Secretary Irene Zohlimpuii Chongthu chuan NEC Vision 2047 thil tumte tihhlawhtling turin sawrkar, Private Sector, khawtlang leh Stakeholder dang zawng zawngte tanrual a ngaih dawn thu a sawi a. Entrepreneurship tihhmasawn nana inkaihhruaina zamte ngaihtuah nawn leh a tul thu sawiin, Myanmar leh Bangladesh nena ramri kaltlanga insumdawntawnna kawngah Mizoram in dinhmun pawimawh tak a chan thu a sawi a. Thalaite Entertainment Sector, a bik takin Film leh Music lamah thuk zawka an luh chhoh mek zel thu a sawi bawk.

NEC Senior Economic Adviser Sherry Lalthangzo chuan thil tam tham zawk hmun danga thawnchhuak tura tanlak a tul thu leh Vawksa leh thil dangte siamchhuah tihpun a tul thu he hunah hian sawiin, Matabari Deep Sea Port chhawr tangkai theih dan tur chungchang a sawi bawk a. NIPER kaltlanga thlai chi chi hrang hrang siam-chhuah tuma hmalak mek a ni tih sawiin, NEC chuan loneitute leh ei leh in siamna Sector-te tana Marketing pui turin NE RACE platform a tlangzarh tih a sawi a. DoNER-in investment ti theite hip tumin investment summit a buatsaih dawn thu a sawi bawk.

He hunah hian NEDFi Executive Director S.K. Baruah chuan Vision 2047 document siam turin mithiam 34 leh Core Member 4 awmna Committee-in Sawrkar laipui leh State-te rawn chunga hma an lak mek thu a sawi a. Drafting Committee-a Core Committee Member, Prof. K.M. Bujarbaruah chuan NEC Vision Plan 2047 chungchang chu he hunah hian chipchiar takin a sawi bawk a ni.