Police in Mahindra Thar lei an sawifiah

Mizoram Police te chuan tunhnaia Motor thar pathum (3)- Mahindra Thar lei te chu Mizoram Police Department in CM Security (Police duty) te hman atana lei a ni tih sawiin, Chief Minister hman tura lei a ni lo tih an sawi.

Nimin-a thuchhuah an siamah Mizoram Police te chuan Chief Minister chu Government of India Table of Precedence-ah 7-na ah awmin Z+ Category Security pek a ni tih an tarlang a. A chhuahvah hian a hma lamah Pilot Car-in hma hruaiin, a hnungah Escort Motor leh Tail Car-in a zui tur a ni tih an tarlang a. Chumi atana lirthei hman thin te chu Chief Minister Motor kawl ni lovin, Police Department-in Security atanga an pek a nih thu leh State danga an zin pawhin Chief Minister-te chu Security pek an ni tih an tarlang.

Mizoram Police thuchhuah chuan Mizoram Chief Minister Pilot Motor pahnih chu Gypsy an nih thu leh Escort Motor hì Bolero niin Tail Car-ah pawh Gypsy bawk hman thin a ni tih an tarlang a. “Heng lirtheite hi an upa ve tawh hle a, Long Run nana hman nasat tawh an nih avangin an tawng tawh hle. Tunhnaia Chief Minister zinna ah tum thum ngawt an chhe tawh a, tum khat phei chu Escort Motor hi Aizawl-ah hnuh haw a ngai hial a, a thlaktu tur Motor dang ngaihtuah ngai khawpin a awm tawh a ni,” an ti a. Security motor a chhiat hian Chief Minister chu Security mumal nei lovin a kal ta thin tih sawiin, “Hei hi Police Department lam chuan a ngai thutak hle. Tum thum lai a chhiat tawh avang leh Gypsy-te hi Company lamin an siam chhuah tawh loh, AntiLock Braking System (ABS) nei lo, Power Steering ni bawk si lo an nih avangin a rang thei ang bera thlak ngai a ni a, Mizoram leilung ngaihtuahin 4WD thova thlak a ngaih avangin Mahindra Thar hi lei a ni ta a ni,” an ti a. Chief Minister chu Z+ Category Security pek ngei ngai a nihna te, chu mi atana lirthei hman mek an lo upat tawh bawk si avang te, a him tawk tawh loh vang te in Police Department chuan hun rei tak hman zui zel theih tur, a khalhtu leh lirtheia chuang (Security Officers) te tan pawha him tha ngei chu lei a nih thu Police Department thuchhuah chuan an tarlang a, “Heng motor thar te hi Mizoram Police Department in Chief Minister Security (Policem duty) te hman atana lei a ni a, Chief Minister hman tura lei a ni lo,” an ti bawk.