Mizoram Kohhran Inpumkhatna atana hmalakna kal zelah Kohhran tel tur ten thutkhawm an nei

Mizoram Kohhran Inpumkhatna atana hmalakna kal zelah nimin khan Kohhran hrang hrang aiawh te chu Lunglei Serkawn-a Baptist Church of Mizoram, Headquarters Office-a BCM Hall-ah an thukhawm.

Tun tuma thutkhawmah hian Mizoram-a Kohhran pawl hrang hrang aiawh mi 41 telin Committee Chairman leh Mizoram Synod Moderator Rev Vanlalnghaka chuan he hun hi a kaihruai a, Committee Secretary leh BCM-a General Secretary Rev. Dr. R. Lalbiakliana chuan report a pe a, Report-ah hian Meeting hmasa-in Mizorama Kohhran Inpumkhatna tura Pawl din leh a hawnna atana Publicity Committee a din chuan thutkhawm vawi khat an neih tawh thu te, Council of Churches in Mizoram Executive Committee-a Member tur Kohhran Pawl hrang hrang ten an rawn ruat tawh thu leh an vaiin mi 50 an nih thu te, CCM Interim Budget atan Kohhran hrang hrang atangin cheng nuai 27 hmuh a nih tawh thu te, CCM Office lailawk atan Synod Conference Centre, Mission Veng-ah PCI, Mizoram Synod-in an pek thu te tarlan a ni bawk.

Council of Churches in Mizoram hi Mizoram-a Kohhran hrang hrangte Kohhran pakhata inzawmkhawmna tur ni lovin thawhhona leh inpumkhatna tura ruahman a ni a, tum engemaw zat thutkhawm nei tawhin thutkhawm hmasa lamah Council of Churches din chungchang te, Constitution leh Council hawn hun tur leh a hmun te chu rel fel a lo ni tawh a. October 26, 2024 khian Council Meeting hmasa ber chu Mission Veng Presbyterian Kohhran, Aizawl-ah neih a ni ang a, October 27 (Pathianni)-ah Council of Churches in Mizoram Hawnna Inkhawm neih a ni dawn a, inbuatsaihna ngawrh takin kalpui mek a ni.

Tun tum Meeting-ah hian CCM Emblem tur thlanna te, CCM Office thawktu lak chungchang te, CCM hawn Programme leh hemi atana thil tul hrang hrang te ngaihtuahin, Interim budget ruahmanna leh hman mek ennawn te, CCM Rorel Inkhawm, October 26-atana Thu ngaihtuah tur (agenda) chhawpchhuah te an sawiho bawk.

Tuna Report dawn chinah Council of Churches in Mizoram-ah hian Kohhran pawl 8 – Mizoram Presbyterian Kohhran, Mizoram Baptist Kohhran, Evangelical Church of Maraland, Lairam Isua Krista Baptist Kohhran, Evangelical Free Church of India, Isua Krista Kohhran, Bualpui (Ng), Wesley Methodist Church, Mizoram leh Independent Church of India te an awm mek a ni.