NGOCC leh Zo United te Aizawl-ah an inkawm

Mizoram a NGO te intelkhawm, NGO Coordination Committee leh Manipur a Zofa unau pawl, Zo United hruaitute chu nimin khan Aizawl-a Central YMA Committee Room-ah an inkhawm.

He inkawmna hi Central YMA President leh NGOCC Chairman Lalhmachhuana chuan a kaihruai a, Ihe hunah hian Zo United kal zel dan tur leh Manipur a Zofa unau hrang hrang te inpumkhatna leh inunauna chungchang te sawiho a ni a. Zo United hi Zofa unau hnam hrang hrang te lungrual taka an telna a nih avangin tih chak zel a tul thu te, inunauna leh inpumkhatna kawnga theihtawp chhuah a tul thu te sawiho a ni.

Zo United hi nikum September 7 khan NGO Coordination Committee in Manipura Zo hnahthlak unau pawl hrang hrangte nen Central YMA Committee Room-ah din a ni a, Zo United hi Convener Albert Renthlei hovin an tel a, Zo United a tel pawl hrang hrang - Hmar Inpui, Mate Tribe Council, Zomi Council, Mizo People Convention, Sukte Tribe Council, Paite Tribe Council, Tangkhal Tribe Organisation, Hill Tribe Council, Manipur Tribal Forum Delhi, Indigenous Tribes Advocacy Committee aiawh theuh te an tel a. Pawl thenkhat kawng chhia leh harsatna dang avanga tel theilo an awm bawk.