Halmawi-ah Home Minister in ngenna siam

Home Minister K. Sapdanga chuan kumin Krismas, Kumthar leh Puja vuakveta halpuah leh halmawi hal lo turin mipuite a ngen.

Home Minister chuan Inrinni khan thuthar lakhawmtute kawmin halpuah, halmawi, meichher thlawkthei, Silai lem mu nei chi te reng reng chu Mizoram-ah phur lut lo tur leh zuar lo turin sumdawng zawng zawngte ngenin a hriattir a, mitin ten he thupek hi ngai pawimawh turin a ngen bawk. Hriat loh palh awm lo turin Local Council/Village Council leh Tlawmngai pawl hrang hrangte chu an huamchhung theuhah uar taka aurinna hmanga puangzar tura sawmin, Kohhran hrang hrangte pawh inkhawmna hmunah uar taka ngenna siam turin a beisei thu a sawi a. Khapna thupek zawm lo te hremna dan pawh khauh taka kenkawh ngei tum a nih tur thu a sawi a, a bikin Sawrkar hnathawkte chu he thilah hian fihlim turin a chah bawk.

Zawhna chhangin Home Minister K. Sapdanga chuan Krimas leh Kumthar vuakvet laiin Police te chu tunhma aia duty tam tir an nih tur thu a sawi a, tun atangin ramri Check Gate hrang hrangah Police leh tlawmngai pawl te uluk taka duty tura hriattir an ni a, bungraw phur lirtheite bakah Private leh sawrkar Motor-te pawh enfiah nise tih a ni a, mi tinte dan bawhchhe lo tura a ngen thu a sawi a ni.