Sawrkar man a ni lo tih sawi

Home Minister K. Sapdanga'n Vairengte chhehvel Kudam hrang hrang atanga Kuhva ro bag 5849 bo te chu sawrkar man a ni loh avang leh sawrkar in kut a thlak hmaa lakchhuah a nih avangin thubuai ziahluh a ni lo tih a sawi. Nimin-a Assembly Session-a Tuirial bialtu MLA K. Laldawngliana zawhna a chhanna ah Home Minister chuan, Vairengte chhehvel Kudam hrang hrang atanga Kuhva rah ro bo zat chu bag 5741 ni lovin bag 5849 zawk a nih thu a sawi a, heng kuhva bag bo te hi Sawrkar man sa ni lovin Sawrkar in kut a thlak hmaa kuhva neitu nia hriatten an lakchhuah a nih avangin hemi chungchangah hian thubuai ziahluh a ni lo tih House a hrilh a ni. Vairengte chhehvela Kudam Sawrkar-in a khar hnuin Kudam pakhat atangin kuhva bag 15 a bo tih hriat a nih thu sawiin Home Minister chuan, hemi chungchangah hian Vairengte Police Station-ah thubuai ziahluh ni a, thilsual titu ni a puh pawh man a nih thu a sawi bawk.