Infiamna hlawkpui turin sawrkar a in herrem dawn

Sports Minister Lalnghinglova Hmar chuan kan hlawkpui tur ngaihtuah chungin infiamna ah sawrkar chu a in herrem dawn tih a sawi.

‘Zoliana Royte Memorial Indoor 5S Hockey Tournament’ hawnna nizan hmasa a LPS Arena, Falkland-a neih ah Sports Minister Lalnghinglova Hmar chuan Mizoram in infiamna a buaipui dan chu thlak hret hret a ngaih thu sawiin, “Eng sports discipline ah nge India leh Asia, khawvel huap thlenga hming kan chher ve theihna ni a, eng infiamnate nge thalaite eizawnna siamsak thei a, kan uar bik ang tih ngaihtuah chungin Sawrkar a inherrem dawn,” a ti a. Hemi chungchanga inrawnkhawmna kumin June thlaa Mizoram Sports Conclave Aizawl-a neih chu a thupuiah ‘Vision 2036 Olympics’ tih a nih thu sawiin, “India in Olympic Games 2036 thlen a tum a, Mizoram atanga infiammi tam thei ang ber tel ve kan duh a ni,” tiin, “Eng infiamnaah nge India a that a, eng game ah te nge kan lo inbuatsaih ang tih uluk takin kan ngaihtuah mek a ni,” a ti a. Hockey chu khawvel huapa India thatna a nih angin Vision 2036 Olympic Games-a infiamna thlan bik tur zingah a tel tih a sawi a ni.

Hmeichhe Hockey-ah Mizoramin Olympian kan neih bakah a khat tawkin International player kan nei reng tih Sports Minister chuan sawiin, Mipa-ah erawh tanlak a la ngaih thu a sawi a. Kawnpui-a Boys Hockey Academy chu tha zawk leh changtlung zawka kalpui tum in, thawhpui tur (partner) zawnga hma pawh lak mek a nih thu a sawi a. He Tournament buatsaihtu Zoliana Royte (L) nupui Rozingi leh a fate chungah lawmthu a sawi bawk.

Zoliana Royte (L) Indoor 5S Hockey Tournament-ah hian Mipa Team 18 leh Hmeichhe Team 15 an chhuak a, Pool pali ah ve ve then niin, Pool tina a sang te’n Knockout Stage an khel chhunzawm dawn a. Tun thla ni 24-ah Final hi khelh tur a ni ang.