Sawrkar in loneitute hnen atangin a lei dawn lo

Horticulture Department Minister Prof. Lalnilawma’n Sawhthing chu sawrkarin loneitute dawrin a lei dawnlo a, a leitu turte leh a chingtute indawrna tur a ngaihtuah sak dawn tih a sawi.

Nimin a Assembly thutkhawma zawhna leh chhanna hunah Horticulture Minister chuan Sawhthing chingtuten an hralh theih nan sawrkarin theihtawp a chhuah tih sawiin, sawrkar chu a leitu ah tang lo in an indawrna tur lo ngaihtuah saktu tur a ni dawn tih a sawi a, a chingtuten tha taka an hralh theih nan theihtawp an chhuah tih a sawi bawk. Mizoram chhungah mi 20,102 in Sawhthing an ching mek tih pawh Minister chuan sawiin, tun dinhmunah Sawhthing T^m 6586 report an dawn thu leh Department in Sawhthing T^m buaipui turin chak takin hma a lak mek thu a sawi a, khaw tinah Society din ni tawhin hmasawnna a awm theih nan an bawhzui mek tih a sawi.

Prof. Lalnilawma chuan State pawn atanga thlai leh thei lakluh leh endik chu Horticulture Department hmalakna hnuaiah a awm loh avangin a him leh him loh endik chungchangah hriat an nei lo tih a sawi a, Thlai leh thei lakluh him leh him loh endikna Pesticide Residue Analysis Laboratory siam tura hmalakna duanchhuah chu thil tha tak a nih thu a sawi bawk.

Mizoram thlai thar 4 – Sawhthing, Hmun-phiah, Hmarcha leh Aieng te chu Research nena kalpui mek a ni tih sawiin, thlai leina turin sawrkar in rate a siam tawh thu a sawi a. RKVY hnuaiah Mizoram Vety College in Project kum 3 chhung an buaipui hnuah thlai thar State dang atanga lakluh test vek theih tura ruahman a nih thu pawh a sawi a, hemi buaipui nan cheng vbc. 11.8 an sanction thu leh First Installment ah cheng vbc. 2.65 hmuh a nih tawh thu a sawi a, hei hian nasa takin hmundang atanga thil tha zawk lakluh kawngah a pui dawn niin a sawi bawk.