Chakma te an sahimna atan chhuak lo turin ti

Mizo Zirlai Pawl (MZP) General Hqrs. chuan Borapansury-a Mizo Police te kutthlaktute thubuai siam sak an nih hma chuan Chakma te chu an sahim nan pawn chhuak lo turin an hriattir.

MZP General Hqrs. hian nimin khan Aizawl-a MZP Conference Hall-ah Executive Committee Meeting vawi 634-na neiin Chakma khua Borapansury-a Mizo Police pahnih ten Chakma Nuho (Mohila) kut an tawrh chungchang an ngaihtuah a. Mizoram chhung ngeiah Mizoram Police te an him lo leh kut an tuar ta mai chu hriatthiam har an tih thu leh an dem takzet thu an sawi a. Mizo Police kut thlaktute zawng chhuaka Case siam sak tura Sawrkar an ngen bakah pawi khawihtute case siamsak an nih hma chuan Chakma te an sahim nan pawn chhuak lo turin a hriattir nghal a ni.

MZP chuan kumin-a MZP Assembly vawi 68-na Tlangsam, Champhai-a neih turah ‘Ram leh Hnam tan— Mizo zirlaite’ tih chu thupui atan an thlang a, Agenda chhawpchhuah tur paruk thlangin heng zingah hian Mizoram zirnain hma a sawn theihna tur atan Directorate of School Education chu Elementary leh Secondary-ah then anih theih nana hmalak te, Zofa hnam hrang hrang Zirlai pawlte nen an thawhhona a that zawk theih nan ‘Students' Leaders Meet’ neih rawtna te, Zofa hmun hrang hranga awm ten inpumkhatna nghet zawk kan neih theih nana hmalak rawtna te, Mizoram chhunga inkalpawhna kawngpui sialtu NHIDCL ten tha zawka hna an thawh theih nana hmalak rawtna te, Mizoram Schedule Tribe List ennawn a nih theih nana hmalak leh Sawrkar hnathawk mahni nihna in a ken tel aia tam hamthatna la leh hmang te sawrkarin a tih tawp theih nana hmalak rawtna te a tel a ni.