Ramri-a harsatna House-ah sawichhuah a ni

Nimin-a Assembly thutkhawm ah Home Minister K. Sapdanga chuan Mizoram leh Assam-te'n ramri an tih ve ve a inan loh avangin ramri-ah harsatna a thleng thin tih House a hrilh.

Nimin-a Assembly Inkhawm ah MNF Member Lalrintluanga Sailo zawhna chhangin Home Minister K. Sapdanga chuan tunhnaiah Mizoram leh Assam ten ram neitu zawk nia an inchhal ve vena hmunah Assam Sawrkar-in Assam Police Camp panna tur kawng ah hma an la tih Mizoram sawrkarin a hria a, Kolasib District thuneituten a hmunah kalchilh nghalin, an hna leh an hmalakna te chawlh tir nghal tura hriattir an ni tih a sawi a ni. Zawh belhna chhangin State pahnihte'n ramri an tih ve ve a inan loh avanga harsatna thleng thin a nih thu Home Minister chuan a sawi a, Sawrkar hmasain ramri-a hma an lakna chu a fakawm tih pawh sawiin, tunhmaa Mizoram huam chin lo-a ngaih te pawh an lo luah tawh thu leh an hmalakna a chhuanawm takzet tih a sawi a. Ramri buai lai chu Status Quo chhunga mi a ni a, ramri inan loh vanga Status Quo pawh siam ngai a ni a, Assam lam pawhin puhmawhna tur tam tak an nei a, Mizoram pawhin an nei ve bawk a, an ngaihdan inan loh vanga inremna zawnga inbiakna pawh awm a ni tih a sawi a ni.

ZPM sawrkar atangin Chief Minister Level-ah inbiak tan a ni tih Home Minister chuan sawiin, Chief Minister ve ve in bultanin, an hun chhung ngeia ramri harsatna chu chinfel hram tumin thu an thlung a. Chumi bawhzui chuan Political Level-a inbiakna chu tun thla ni 9 khan Assam aiawhte nen neih niin kha inbiakna kha Assam rawtna angin Goodwill Mission ti-a vuahin inbiak bul an tan a. Nakum March ni 31-ah Minister Level-a inkawmna hi awm leh se an tih thu a sawi bawk.