Sangha vulh ah kan State-in intodelh theihna a nei sang hle - Governor

Governor Dr. Hari Babu Kambhampati chuan Sangha vulh ah kan State-in intodelh theihna a nei sang hle tih a sawi.

Governor Dr Hari Babu Kambhampati hian nimin khan Raj Bhavan-ah March 28, 2023-a Fisheries Department nen Meeting an lo neih tawh atanga tun thlenga Fisheries Department hmalakna thlirletna bakah Central Schemes leh Bank kaltlanga Sangha vulhtute tanpui dan tur sawihona a neihpui a. He hunah hian Governor chuan Sangha vulh bikah kan State-in intodelh theihna a nei sang hle tih sawiin, State sum dinhmunin a zir loh avanga Fisheries Department in Budget a nei lian thei lo tih a sawi a, heti chung hian Central sponsored Scheme tam tak, Sangha vulhtute dawmkanna leh tihhmasawnna tur erawh a awm teuh tih a sawi a. Mizoram in Sangha tharchhuah tihpun, kan eikhawp tharchhuah leh hralhchhuak thei tur khawpa tam thar thei tur chuan Fisheries Department in nasa takin tan a lak a, Project tam zawk Central Sawrkarah a thehluh zung zung a ngai tih a sawi bawk.

He Meeting-ah hian Mizoram Rural Bank (MRB), State Bank of India (SBI) leh Mizoram Cooperative Apex Bank (MCAB) hotute pawh Sangha vulhtute nena Bank inthlunzawm leh thawhho a pawimawhzia sawipui tura sawm niin Governor chuan, Central Schemes hnuai atanga Sangha Vulhtuten subsidy an dawn te belhchhah turin Bank Loan an mamawh belh thin tih a sawi a. Sangha vulhtute zingah loan la duh lo an awm thin chu zirchian a tul niin a sawi a. Bank loan chungchang te leh a rulh dan kalphung te chiangkuang taka an hriatloh vang te thil ni thei a nih avangin hemi chungchangah hian Fisheries Department leh Bank lam te pawh thawkhoin tan an lak a tul tih a sawi bawk.

He hunah hian Fisheries Department aiawhin H.Lalengmawia, Commissioner & Secretary chuan tunhnaia Fisheries Department hmalakna te tarlangin, Fisheries Department, Sawrkar hnuaia hmalakna hrang hrang te chu PowerPoint hmangin Director Laltleipuii leh a thawhpui officer-te’n an tarlang a. Fisheries Department chuan Mizoram chhunga Hectare 24000 chu Sangha dil siam theihna niin an chhut a, heng zingah hian Hectare 4000 chuang velah Sangha Vulhtuten hma an la mek a ni. Rampum huap anga chhutin mi pakhatin kum khat chhungin Sangha kg. 11 atanga kg 13 inkar vel a ei tlangpui a. Mizoram-ah chuan kum khat chhungin mi pakhat tan kg. 6.4 chauh a la tharchhuak thei a, a tam zawk chu pawn lam atanga lakluh thin a ni.