CM hovin Project bawhzui zel dan tur sawiho

Nimin khan Chief Minister Lalduhoma hovin CM Conference Hall-h sawrkar mi pawimawh ten hmasawnna project kal mek leh hmachhawp thenkhatte kalpui dan an sawiho a. Heng zingah hian Bairabi to West Phaileng inkara 132 K/v SC line hnathawh Forest Clearance bawhzui dan tur te, Pukzing leh Silsury inkar kawngpui zauhna tur Forest Clearance hmalak tawh chin te, Tualpui leh Champhai inkar kawngpui siam tura Forest Clearance atana hmalak tawh chin te an sawi a. Heng project-a thil pawimawh dang te pawh an sawi bawk. He hunah hian PWD, Forest leh P&E Department changtu Minister te bakah Adviser to CM (Finance), Chief Secretary leh Department mi pawimawh te an tel a ni.

Nimin vek khan Chief Minister Lalduhoma ho hian CM Conference Hall-ah Mizoram in Externally Aided Projects (EAP) a kalpui mek leh kalpui tur hmachhawp te sawiho a ni bawk a. He hunah hian Projects kal mek bawhzui zel dan tur te, Department of Economic Affairs in loan puk theih zat a bituk chhunga insiamrem dan tur te leh Project thehluh tura duan Council of Ministers in a ngaihtuah hmabak la awm te an thlirho a ni. He thutkhawm ah hian Forest, Tourism, P&E leh Sports Minister bakah Adviser to CM (Finance) leh Chief Secretary bakah Project kaihhnawih official pawimawh te an tel a ni.