Aikal lak tihtawp tumin sawrkar in hma a la zui zel

Mizoram sawrkar chuan ‘Aikal lak’ tihtawp tuma hma la zelin a ruka Aikal lo la la ru reng an awm lohna turin mipuite pawh thawhpuiah a sawm bawk.

Mizoram sawrkar chuan Aikal lak tihtawp a nih theihna tura hma a lakna ah Aikal la te inchinfelna hun a ruahman sak a, Department hrang hrang atangin aikal la an neih dan report pe turin hriattirna a chhuah tawh angin leh a hun ruat a tawp tak avangin ruahmanna a siam mek zel a. Tun thla ni 5 khan Commissioner & Secretary, DP&AR Office Chamber-ah hemi chungchang hi sawiho niin Compliance Report thehluh huntiam chhung chu August 3, 2024 khan zo tawhin, Department 41 hnen atangin report hi dawn niin Report la thehlut lo Department pathum an awm bawk a. Heng Department te hian Report thehluh leh an tum thu sawiin, he report hi la enfiah leh tur a nih avangin tun dinhmun ah aikal la dinhmun hi hriat theih ala ni lo a. Aikal la te chungchanga hmalak zui dan tur pawh ruahmanna siam a ni bawk.

He ruahmanna an siam dan chuan kumtira DP&AR (ARW)-in Aikal list a khawn khawma Department-ten list an submit leh tuna Compliance Report an thehluh te en dun a, Manual Checking neih nise an ti a. Department-wise report siam in hemi atan hian chawlh la chhunzawm nghal, Voluntary Retirement emaw, Invalid Pension emaw dil te leh a dang te chhinchhiah hran ni se an ti a. Cross-checking neih zawh hnuah hna la zawm lo (Sawrkar thupek zawm lo) an awm a nih chuan dan anga action la turin Administrative Head of Department (Principal Secretary, Commissioner & Secretary, Secretary, etc.) hnenah action la tura hriattir ni se, an hmalakna report chu ni 10 (sawm) chhungin thehlut tura hriattir ni bawk se an ti a. Action la lo an awm chuan Controlling Officer chungah Disciplinary Proceeding draw tur a ni anga. He hmalakna ah hian Department zawng zawng en zawh hun nghak lo in, en zawh hmasak apiang hi hriattir nghal zel tur an ni.

Heti chunga aikal la ruai chhunzawm zel an awm anih chuan Controlling Officer – Head of Office, Head of Department, etc. te mawhphurhna a ni anga, kal phaltirtu chungah dan angin Disciplinary Proceeding Draw a ni ang. Hei bakah hian a ruka aikal ruai an awm leh awm loh endik turin Surprise Checking chu Office hrang hrangah neih tur a ni bawk a. Aizawl District chhung bik chu DP&AR-a hnathawktu ten an endik anga, District dang zawng erawh chu Concerned Deputy Commissioner-ten mawhphurhna an la dawn thung a ni.

Aikal lak tih tawp a nih ngei theihna turin sawrkar chuan hmalak zel a tum tih pawh sawrkar chuan sawiin, a ruka Aikal lo la ru reng an awm lohna turin mipuite pawh thawhpuiah sawrkar chuan a sawm a ni.