Aizawl khawpui chhung atanga Assam Rifles an la insawnloh chhan MoU la peih loh vang a ni tih sawi

Chief Minister Lalduhoma'n Aizawl khawpui atanga Assam Rifles sawn chhuah hna chu Union Home Minister-in kum khat chhunga zawh theih a ni tih a sawi thu House a hrilh a. Aizawl khawpui chhung atanga Assam Rifles an la insawnloh chhan chu MoU an la peih loh vang a ni tih House a hrilh bawk. 

Nimin-a Mizoram Legislative Assembly thutkhawm ah Chief Minister Lalduhoma chuan Hachhek bialtu MLA, Robert Romawia Royte zawhna sawi zuinaah Assam Rifles chhuah dan tur chungchanga inremna thuthlung, MoU chu sawrkar hmasa leh Assam Rifles-te'n a hran hran ve ve-a an neih chu a hlawhtlin loh avangin sawrkar thar hnuaiah ama kaihhruainain ngaihtuah that leh a ni tih a sawi a, an ngaihdan leh duh dan inang lo te chu huam zau takin an sawi ho a, an inrem lohna zawng zawng sawifel vek thei lo mah se, thil nihphung tam tak an hrilhfiah tih a sawi a. Hemi hnua Union Home Minister nen an inkawmnaah Assam Rifles chu an chhuah thuai a ngai tih a hrilh thu leh MoU tihkhawtlai reng chu Home Ministry kaihhruaina hnuaiah sawiho se, an inrem lohna chu sawifel turin inbiak nise tih a rawt a. Hemi bawhzui hian Union Home Minister chuan MoU chu kar khat chhunga tihfel an tum tur thu Telephone hmangin a hrilh a, a hnuah Assam Rifles lamin MoU hi ziah that an duh thu an sawi avangin nghah an ngai a, an ruahmanna chu a hlawhtling thei ta rih lo tih a sawi. 

Chief Minister chuan, hemi hnua Union Home Minister nen an inkawmnaah Union Home Ministry atangin Jt. Secretary leh IB atangin Senior Officer pakhat Aizawlah a lo tirh tur thu a hrilh tih a sawi a. Hetihlai hian Assam Rifles lamin MoU an ziah that an nghak leh a, sawrkar laipui lam thu a hmuh chu a khawtlai ta tih Chief Minister chuan sawiin, “Vawiin thlengin sawrkar laipui hmalakna erawh a la hlawhtling lo a ni,” a ti a, tuna an nghah chu MoU sawifel a nih thu sawiin, Home Minister sawi dan chuan, Assam Rifles sawnchhuh hna chu thla thum dan zelah kalpuiin, kum khat chhung chuan zawhfel theih a ni ang tiin a hrilh thu a sawi bawk.