Mipui nawlpui rilru puthmang siamthat a la ngai tih sawi

Mizoram State Commission for Protection of Child Rights (MSCPCR) Chairman Jimmy Laltlanmawia'n naupang pawikhawihtute laka mipui nawlpui rilru puthmang siamthat a la ngai nasa hle tih a sawi.

MSCPCR hotute chuan nimin khan Aizawl Press Club-ah thuthar thehdarhtute kawmin an hmalakna leh mawhphurhna hrang hrangte an tarlang a, he hunah hian an Chairman Jimmy Laltlanmawia chuan Mizoram mipui nawlpuiin naupang enkawlna kawngah hma an sawi laiin hmasawnna tur a la tam thu a sawi a, naupangte humhalhna Dan tha tak tak kan neihte hi naupang ti hluhlangtu leh ti pawngpawrhtu ang deuha ngai kan la awm chu a dik lo tih a sawi a, naupang kum 18 la tling lote chu pawi an khawih a nih pawhin 'hrem tur an ni lova, siamthat tum tur an ni' tih hi khawvelin a pawm dan leh tuna kan Dan hmanlai-in a tum ber pawh a ni, a ti. MSCPCR hi India Parliament-in ‘The Commission for Protection of Child Rights (CPCR) Act, 2005’ a pass anga dan-in a phut angin kum 2018 khan din a ni.