ZPM Thalai ten mipuite thamlohna lian takah ngai

ZPM Thalaite chuan kum 2023-2024 chhûnga AMC-a Property Tax tlingkhawm atanga cheng vbc. 1.95 hmanna hriat lohva a awm chu mipui thamlohna lian takah an ngai tih an sawi.

Nimin a thuchhuah an siamah ZPM Thalai Hqrs. chuan hmasawnna tur leh khua leh tui tha rilru pu chunga mipuite'n chhiah pek an rem tih êm êm laia, a hmanna hriat lohva chhiah pêk tlingkhawm heti zat a luangral leh si chu lungchiatthlak an tih thu an tarlang a. Bawlhhlawh hâlralna khawl cheng vbc. 2.74 man, darkar 24 chhûnga bawlhhlawh ton 10 hâlral thei tura ngaihin ton khat pawh a hâlral thei lo-te, a hnu reilo te-ah hman loh a dah tawl leh mai mai a ni leh si te chu MNF sawrkâr vânglaia Police Mawza man to leh Êk In kal thei ang maia sum siamna-ah an ngai tih an sawi a. AMC-ah MNF-in thuneihna an chan kum 2021 -2024 chhûnga an party mi leh sa te vulhna atâna cheng vbc. 30.92 chuang man hna, khawpui tihhmasawnna tur pawh ni lo, party invulhna atâna hna tenau an siamchawpte pawh thuneihna hmansualna lian takah an ngai tih an tarlang a. MNF Party chu hemi chungchang ah hian an insawifiah ngam dawn em tih zawtin, an insawifiah ngam lo a nih chuan AMC Inthlanpui leh by-election lo awm turah mipui fiahna paltlang a harsa hle turah an ngai tih an tarlang bawk.