Tualpui khua in an khawchhuak Chief Minister lawmna leh chawimawina hun an buatsaih

Khawzawl District-a Tualpui khua chuan an khaw chhuak Lalduhoma chu Mizoram Chief Minister anih lawmna leh chawimawina hun nimin khan an buatsaih a. Chief Minister hi a nupui Liansailovi leh a chhungte bakah sawrkar mi pawimawh thahnem takin an tawiawm bawk a ni.

Tualpui khawtlang in Tualpui Mual Zawl-a Chief Minister Lalduhoma chawimawina hun an buatsaih ah hian Lalduhoma chuan amah leh a chhungte siam lian a, a thlavang vawi tam hauha chawimawi thintu Tualpui khawtlang chungah lawmthu sawiin, Mizoram-a la thleng ngai zen zen lo, a lim din a ni chu zahthlak a tih thu leh phu lo a intih thu a sawi a, Organising Committee lam ten tul an tih tlat avangin hreh tak chungin a pawmpui tih sawiin, Chief Minister anih lawmna leh chawimawina hun buatsaihtu leh amah tawiawmtu te chungah lawmthu a sawi bawk.

Chief Minister hian Tualpui khawtlangin an khaw tan chauh ni lo, ram pum leh bial huapa inang tlanga hmasawnna hna thawh an duh tih an sawi chu a ropui hle tih sawiin, Kalkhawmte chu Tualpui khua tihmingchhetu ni lo tur leh Tualpui khaw hmingthatna - buh ngah, hlo thlawh chak leh taima khua an nihna chhawm nung zel zawk turin a chah. Mimal, chhungkua leh khawtlang min runtu ruihhlo laka fihlim theuh turin a ngen bawk.

Chief Minister Lalduhoma hian  School Education Minister Vanlalthlana thilpek - ‘Smart Board’ chu Tualpui High School hnenah hlanin Tualpui Primary leh Middle School Building te chu sak that an nih tur thu a sawi bakah Zirtirtu indaihlohna pawh phuhruk thuai an tum tih a sawi a. Health Minister Lalrinpuii aiawhin Tualpui Health & Wellness Center hnenah damdawi engemaw zat pein Tualpui khaw power lakluhna 11Kv line thar siam nan P&E Department hnuaiah cheng nuai 113.94 an ruahman thu pawh a sawi bawk.

Chief Minister Lalduhoma lawmna leh chawimawina hun Tualpui khua in an buatsaih hi CM Chawimawina Organising Committee Chairman C. Lalromawia chuan kaihruaiin Sports Minister Lalnghinglova Hmar; RD Minister Prof. Lalnilawma; ZOHANDCO Chairman Lalliansawta leh Khawzawl District Bawrhsap K. Lalrohlua te bakah Lunglei HPC Vice Chairman V. Malsawmtluanga, Tualpui VC President Ramengmawia leh MHIP President Ngurpianmawii te pawhin thu an sawi bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man