Document lem hmanga hna hmu in banna thehlut

Mizoram chhunga Dentist (Ha Doctor) hnathawk zingah document lem hmanga hna hmu nia hriat chuan banna thehlutin a banna hi amah chhawrtu National Health Mission (NHM) chuan an pawmsak nghal.

Mizo Zirlai Pawl (MZP) chuan Mizoram chhunga National Health Mission (NHM) hnuaia Dentist Surgeon (Ha Doctor) hnathawk mek zingah document lem hmanga hna hmu an awm ngei nia hriain, RTI Act hmanga an chhui zui hnuah NHM hnuaia thawk tura kum 2023 February thlaa lak zingah a tel nia hriat a ni a, hei mai bakah hian Doctor a zirchhuahna nia tarlan Institution-ah hian a lut lo hrim hrim tih an finfiah niin an sawi bawk.

Hetiang a nih avang hian MZP chuan Health Minister hnenah an thu hriat hi chhuichiang tur leh a tul anga hma la tura ngenna lehkha thehlutin June 21, 2024 ralhma ngeia hma la turin an ngen a, MZP ngenna hi chak taka a bawhzui nghal niin, Dentist Surgeon hian June 5, 2024 (Nilaini) khan amah chhawrtu National Health Mission (NHM)-ah banna lehkha thehlutin NHM chuan June 6, 2024 khan banna lehkha hi a pawm nghal tih MZP chuan an sawi a ni. MZP chuan thuchhuah siamin an ngenna ngaipawimawh a chak taka Health Minister-in hma a lak avangin lâwmthu an sawi a, Health Department bakah, Department dang dangah pawh hetiang thil; Document lem leh dik lo taka hna hmu an awm leh awm loh an enzui zel dawn tih an sawi a ni.