Thenzawl HSS kum 20 tlin lawmna CM in a hmanpui
Chief Minister chuan kum 2004 khan Thenzawl Village Council te chuan mamawhna a san em avangin he School hi an din tih sawiin, an din chhan ang ngeiin Thenzawl leh a chhehvel khuaten an chhawr tangkai hle tih a sawi a. Result an neih that thin avangin admission pawh lak sen loh an nei kumtin tih thlengin a hriatpui tih sawiin, “Hun harsa tam tak paltlanga kum 20 tluang taka a kal thei hi ka lawm a, a kal zelna turah pawh duhsakna ka hlan. In mamawh leh harsatna te pawh hi a theih ang angin kan ngaih-tuah zel dawn a, engkim ka hriatpui che u a, dil leh nawr kan ngai vak lovang,” tiin a chah a ni.
Chief Minister chuan kumtin lehkhathiam kan pun zel thu leh sawrkar hna kan hmu vek thei lo tih sawiin, Skill development lam uar a mahni ke-a ding thei tura beih te, rampawn leh State pawna hna hmu thei tura kan inbuatsaih te a pawimawh thu a sawi a. “Thalai Skill nei tha te chu kan Flagship Policy Bana Kaih hmanga thawhpui kan tum a, ka bial chhungah thawhpui tlak thalai tha tak tak awm thei ula a lawmawm hle ang,” tiin zirlai kal khawmte a fuih a ni.
He hunah hian School Principal H. Lalmawia'n an School chanchin sawiin, Chief Minister-in an School a tlawh fo avangin lawmthu a sawi a, “Vawi tam tak min lo tanpui tawh thin a ni,” a ti a. Higher Section bik hi kum 2008 khan Adhoc Grant-in-Aid pek an ni a, High School Section hi kum 2018 ah Lumpsum Grant-in-aid Status pek a ni. Tunah hian Higher-ah zirlai 138 leh High School ah 92 an nei mek a ni. Nimin-a hun hman ah hian HSLC leh HSSLC Exam result chhuakta a First Division leh a chunglam a pass mi 28 te hnenah lawmpuina an hlan a ni.
Comments
Post a Comment