Serchhip-ah 'World Blood Donor Day' hmangin Pawl hming-a thisen pe te chawimawi an ni

Khawvel puma thisen petu te chawimawina leh thisen pe tura infuihtharna ni atana hman thin, 'World Blood Donor Day' chu khawvel hmundangte rualin Serchhip-ah pawh nimin khan hman a ni a, sawrkar kum liamta chhunga pawl hming-a thisen pe te chawimawina hlan an ni.

'World Blood Donor Day' puala Serchhip CMO Confetence Hall-a hun hman hi Serchhip-a Sr. Chief Medical Officer Dr. LP. Malsawma chuan khuallian nia hmanpuiin he ni pual hian midang te tana tlawmngai thisen pe thin te chu Chibai a buk a. Thisen chu nunna atana pawimawh a nih thu sawiin, mi tlawmngai leh pawl hrang hrangte thisen pek avangin damlo ten an mamawh hunah thisen hmuin damna an chan phah thin tih a sawi a. Serchhip District-ah mi tlawmngai,a thlawna thisen pe duh thahnem tak an awm avanga thisen pe duh pawl hrang hrangte pawhin an duh hunah pek theihloh chang an nei thin chu thil lawmawm tak a ni tih a sawi a, chutihrual chuan thisen pek chu hman theih hun chhung awm leh mamawh reng a nih avangin tlawmngaia thisen pe zel turin mimal leh pawl hrang hrangte chu a sawm nghal bawk a ni.

Serchhip-a World Blood Donor Day puala hun hman hi Association for Voluntary Blood Donation (AVBD) Serchhip Branch-a Secretary T. Biakchamliana chuan a kaihruai a, District Hospital Serchhip-a Blood Bank Officer Dr. Lalnunhlima Khiangte chuan sawrkar kum liamta, April 1, 2023 atanga March 31, 2024 thlenga an hnathawh dan te tarlangin, hemi hun chhung hian pawl leh Office hrang hrang 29 ten Blood Donation Camp tum 33 an nei a, heng ah hian thisen Unit 514 lak niin heng pawl hminga thisen pe te hnenah hian chawimawina thuziak chu he hunah hian hlan a ni bawk a. Mi tlawmngai ten tha taka thisen an pek thin avangin damlo ten an mamawh huna thisen dawn tur tlakchham an neih meuh loh thu sawiin, thisen mamawh bik a awm chang erawh chuan an mamawh anga lak chawp erawh a awm thin thu a sawi bawk.

Chhinchhiahna atanga a lan danin kum 2023-2024 chhung khan Serchhip District Hospital Blood Bank-ah hian thisen Unit 831 lak niin heng zinga Unit 793 te chu mi tlawmngai ten a mamawh apiangte hman tura a thlawna an pek a ni a, hei hi thisen pek atanga chhutin za zela 95.43 tlingin thisen Unit 698 pekchhuah a ni a, Serchhip Blood Bank-a thisen pek hi Serchhip District chhung bakah District pawnlam atang te pawhin a mamawh ten an rawn la thin a ni.

Kum kalta chhunga Serchhip Blood Bank-a thisen petu pawl hrang hrang zingah hian Kohhran Thalai pawl hminga pe 22 awmin zirna In hming (NSS/NCC/DIET) a thisen pek tum 6 a awm bawk a, Sipai leh Police hminga pek tum thum awmin YMA hminga pek tum khat leh pawl dang hminga pek tum khat a awm bawk a ni.